1 Andin keyin Pǝrwǝrdigar Musaƣa sɵz ⱪilip: «Fir’ǝwnning aldiƣa berip uningƣa: ‹Ibraniylarning Hudasi Pǝrwǝrdigar mundaⱪ dǝydu: «Manga ibadǝt ⱪilixi üqün hǝlⱪimni ⱪoyup bǝrgin. 2 Əgǝr ularni ⱪoyup bǝrmǝy tutup tursang, 3 mana, Pǝrwǝrdigarning ⱪoli etizliⱪtiki qarwa mallarning üstigǝ, yǝni at, exǝk, tɵgǝ, kala wǝ ⱪoylarning üstigǝ qüxüp, eƣir bir waba kǝltüridu. 4 Lekin Pǝrwǝrdigar Isra’ilning qarwilirini Misirliⱪlarning qarwiliridin pǝrⱪlǝndüridu. Bu tǝriⱪidǝ Isra’ilning qarwiliridin ⱨeqbiri ɵlmǝydu»› dǝp eytⱪin» dedi. 5 Andin Pǝrwǝrdigar bir waⱪitni tohtitip: «Ətǝ Pǝrwǝrdigar bu zeminda mundaⱪ ⱪilidu» dedi. 6 Ətisi Pǝrwǝrdigar xundaⱪ ⱪildi. Misirliⱪlarning ⱨǝmmǝ qarwiliri ɵlüp kǝtti, lekin Bǝni Isra’ilning qarwiliridin birisimu ɵlmidi. 7 Fir’ǝwn kixi ǝwǝtip tǝkxürtsǝ, mana, Isra’ilning qarwa malliridin ⱨeqbiri ɵlmigǝn ikǝn. Lekin Fir’ǝwnning kɵngli ⱪattiⱪ jaⱨil bolƣaq, hǝlⱪni ⱪoyup bǝrmidi.

8 Andin Pǝrwǝrdigar Musa wǝ Ⱨarunƣa: «Humdanning külidin siⱪimlap elinglar. Andin keyin Musa uni Fir’ǝwnning kɵz aldida ⱨawaƣa qaqsun. 9 Xundaⱪ ⱪilixi bilǝn kül pütün Misirning zeminiƣa tarⱪilidiƣan qang-tozanƣa aylinip, adǝmlǝr wǝ ⱨaywanlarƣa qüxidu. Xuning bilǝn pütün Misir zeminida ularning bǝdǝnliridǝ yiringliⱪ qaⱪilar pǝyda bolidu» dedi. 10 Ular humdandin kül elip, Fir’ǝwnning aldiƣa barƣinida, Musa uni ⱨawaƣa qaqti. Xuning bilǝn adǝmlǝr wǝ ⱨaywanlarning bǝdinidǝ yiringliⱪ qaⱪilar pǝyda boldi. 11 Jadugǝrlǝr, qaⱪining dǝstidin Musaning aldida turalmay ⱪaldi. Qünki baxⱪa Misirliⱪlarningkigǝ ohxax jadugǝrlǝrning bǝdinigimu yiringliⱪ qaⱪilar yamrap kǝtkǝnidi. 12 Lekin Pǝrwǝrdigar Fir’ǝwnning kɵnglini ⱪattiⱪ ⱪilip ⱪoyƣini üqün, Pǝrwǝrdigar Musaƣa eytⱪinidǝk u ularƣa ⱪulaⱪ salmidi.

13 Andin keyin Pǝrwǝrdigar Musaƣa mundaⱪ dedi: «Tang sǝⱨǝrdǝ turup, Fir’ǝwnning aldiƣa berip uningƣa: ‹Ibraniylarning Hudasi Pǝrwǝrdigar mundaⱪ dǝydu: «Manga ibadǝt ⱪilixi üqün hǝlⱪimni ⱪoyup bǝrgin. 14 Bolmisa Mǝn bu ⱪetim ⱨǝmmǝ balayi’apǝtlirimni ɵzüng, hizmǝtkarliring wǝ hǝlⱪingning üstigǝ ǝwǝtimǝn. Buning bilǝn pütün yǝr yüzidǝ Mening tǝngdiximning yoⱪluⱪini bilisǝn. 15 Qünki Mǝn Ɵz ⱪolumni uzitip, ɵzüng wǝ hǝlⱪingni waba bilǝn urƣan bolsam idi, bu waⱪitⱪiqǝ sǝn yǝr yüzidin yoⱪ bolup ketǝtting. 16 Lekin Ɵz ⱪudritimni sanga kɵrsitip, namimning pütkül yǝr yüzidǝ jakarlinixi üqün seni ornungƣa tiklidim. 17 Sǝn tehiqila hǝlⱪimgǝ tǝkǝbburanǝ mu’amilǝ ⱪilip, ularni ⱪoyup bǝrmǝywatamsǝn? 18 Mana, ǝtǝ muxu waⱪitlarda Misir dɵliti bina bolƣandin tartip ⱨazirƣiqǝ kɵrülüp baⱪmiƣan ⱪattiⱪ mɵldür yaƣdurimǝn. 19 Xuning üqün, ⱨazir kixi ǝwǝtip qarwa malliring wǝ etizdiki ⱨǝmmǝ nǝrsiliringni yiƣip daldiƣa alƣin. Qünki iqkirigǝ kirmǝy taxⱪirida ⱪalƣan adǝmlǝr wǝ ⱨaywanlarning ⱨǝmmisi mɵldür astida ⱪelip ɵlüp ketidu»› dǝp eytⱪin». 20 Fir’ǝwnning hizmǝtkarlirining iqidin Pǝrwǝrdigarning sɵzidin ⱪorⱪⱪan ⱨǝr kixi ɵz hizmǝtkarliri wǝ qarwa mallirini ⱨǝydǝp ɵylirigǝ kiriwaldi. 21 Lekin Pǝrwǝrdigarning sɵzigǝ ǝⱨmiyǝt bǝrmigǝnlǝr ɵz hizmǝtkarliri wǝ qarwa mallirini taxⱪirida ⱪaldurdi. 22 Pǝrwǝrdigar Musaƣa: «Pütün Misir zeminidiki adǝmlǝr wǝ ⱨaywanlarning üstigǝ wǝ etizdiki ⱨǝmmǝ zira’ǝtlǝrning üstigǝ mɵldür yaƣsun dǝp, asmanƣa ⱪarap ⱪolungni kɵtürgin» dedi. 23 Musa ɵz ⱨasisini asmanƣa kɵtürgǝndǝ Pǝrwǝrdigar ⱨawani güldürlitip, mɵldür yaƣdurup, yǝr yüzigǝ ot-qaⱪmaⱪ qaⱪturdi. Bu tǝriⱪidǝ Pǝrwǝrdigar Misir zemini üstigǝ mɵldür yaƣdurdi. 24 Mɵldür yeƣip turdi wǝ mɵldür arisida ot-qaⱪmaⱪ qaⱪti. Misir dɵliti bina bolƣandin tartip u yǝrdǝ undaⱪ ⱪattiⱪ mɵldür yeƣip baⱪmiƣanidi. 25 Mɵldür pütün Misir zeminiƣa yeƣip, insan bolsun, ⱨaywan bolsun, taxⱪiridikilǝrning ⱨǝmmisini uruwǝtti. Mɵldür etizdiki ⱨǝmmǝ zira’ǝtlǝrni urup, ⱨǝmmǝ dǝl-dǝrǝhlǝrnimu sunduruwǝtti. 26 Pǝⱪǝt Bǝni Isra’il turuwatⱪan Goxǝn wilayitida mɵldür yaƣmidi.

27 Fir’ǝwn kixi ǝwǝtip, Musa wǝ Ⱨarunni qaⱪirtip, ularƣa: «Bu ⱪetim mǝn gunaⱨ ⱪildim. Pǝrwǝrdigar adildur, mǝn wǝ hǝlⱪim bolsa gunaⱨkardur. 28 Pǝrwǝrdigarƣa yalwurup du’a ⱪilinglar. Bu ⱨǝywǝtlik güldürlǝx wǝ mɵldür yetǝr ǝmdi. Mǝn silǝrni ⱪoyup berimǝn. Bu yǝrdǝ yǝnǝ turuxunglar lazim ǝmǝs» dedi. 29 Musa uningƣa jawab berip: «Mǝn xǝⱨǝrdin qiⱪip kǝtkǝndǝ Pǝrwǝrdigar tǝrǝpkǝ ⱪollirimni kɵtürimǝn. Buning bilǝn güldürlǝx tohtaydu wǝ mɵldür yǝnǝ yaƣmaydu. Yǝr yüzi Pǝrwǝrdigarningkidur dǝp bilixing üqün xundaⱪ bolidu. 30 Lekin sǝn wǝ hizmǝtkarliringning tehi Pǝrwǝrdigar Hudadin ⱪorⱪmaydiƣanliⱪinglarni bilimǝn» dedi. 31 Ziƣir wǝ arpa mɵldürdin wǝyran ⱪilinƣanidi, qünki arpa bax qiⱪarƣan wǝ ziƣir ƣunqiliƣan waⱪit idi. 32 Biraⱪ buƣday wǝ daƣal buƣday tehi bih qiⱪarmiƣaqⱪa, wǝyran ⱪilinmiƣanidi. ^◼   33 Musa Fir’ǝwnning aldidin ayrilip xǝⱨǝrdin qiⱪip, Pǝrwǝrdigar tǝrǝpkǝ ⱪollirini kɵtürdi. Xuning bilǝn güldürlǝx wǝ mɵldür tohtidi. Ⱪattiⱪ yamƣurning yǝrgǝ tɵkülüximu tohtidi. 34 Əmma Fir’ǝwn yamƣur, mɵldür wǝ güldürlǝxning tohtiƣinini kɵrgǝndǝ, u gunaⱨ ⱪilixni dawam ⱪildi. U wǝ hizmǝtkarliri tehimu ⱪattiⱪ jaⱨilliⱪ ⱪilixti. 35 Fir’ǝwn ⱪattiⱪ jaⱨilliⱪ ⱪilip, huddi Pǝrwǝrdigar Musa arⱪiliⱪ eytⱪandǝk Bǝni Isra’ilni ⱪoyup bǝrmidi.