1 Pǝrwǝrdigar Musaƣa yǝnǝ sɵz ⱪilip: «Sǝn Ⱨarunƣa: ‹Paⱪilarning Misir zeminining üstigǝ qiⱪixi üqün ⱨasa tutⱪan ⱪolungni eⱪinlar, ɵstǝnglǝr wǝ kɵllǝr tǝrǝpkǝ uzatⱪin› dǝp eytⱪin» dedi. 2 Ⱨarun ɵz ⱪolini Misirning sulirining üstigǝ uzatti. Xundaⱪ ⱪilƣanda, paⱪilar qiⱪip Misir zeminini basti. 3 Lekin jadugǝrlǝrmu ɵz jadusi bilǝn ohxax ixni ⱪilip, Misir zeminiƣa paⱪa qiⱪardi. 4 Fir’ǝwn Musa wǝ Ⱨarunni qaⱪirtip: «Paⱪilarning mǝn bilǝn hǝlⱪimdin yiraⱪ ketixi üqün Pǝrwǝrdigarƣa du’a ⱪilinglar. Andin keyin mǝn hǝlⱪning Pǝrwǝrdigarƣa ⱪurbanliⱪ ⱪilƣili berixiƣa ijazǝt berimǝn» dedi. 5 Musa Fir’ǝwngǝ: «Paⱪilarning pǝⱪǝt Nil dǝryasida ⱪelip, ɵzüngdin wǝ ɵyliringdin yiraⱪ ketixi üqün, sening ⱨǝm hizmǝtkarliring wǝ hǝlⱪing üqün du’a ⱪilidiƣan waⱪtimni sǝn bekitkin» dedi. 6 U: «Ətǝ bolsun» dǝp jawab bǝrdi. Musa: «Pǝrwǝrdigar Hudayimizning ohxixi yoⱪluⱪini bilixing üqün sening eytⱪiningdǝk bolsun. 7 Paⱪilar sǝndin, ɵyliringdin, hizmǝtkarliring wǝ hǝlⱪingdin yiraⱪ ketip, pǝⱪǝt Nil dǝryasida ⱪalidu» dedi. 8 Xuning bilǝn Musa wǝ Ⱨarun Fir’ǝwnning aldidin qiⱪip kǝtti. Musa Fir’ǝwnning üstigǝ ǝwǝtilgǝn paⱪilar toƣrisida Pǝrwǝrdigarƣa yalwurup du’a ⱪildi. 9 Pǝrwǝrdigar Musaning tiliginini orunlidi. Buning bilǝn paⱪilar ɵlüp, ɵy, ⱨoyla wǝ etizlardin yoⱪ bolup kǝtti. 10 Hǝlⱪ ularni dɵwǝ-dɵwǝ ⱪilip toplidi, pütün zemin sesiⱪqiliⱪⱪa toldi. 11 Lekin Fir’ǝwn paⱪilardin halas bolƣinini kɵrgǝndǝ ⱪattiⱪ jaⱨilliⱪ ⱪilip, Pǝrwǝrdigar eytⱪinidǝk ularƣa ⱪulaⱪ salmidi.

12 Andin keyin Pǝrwǝrdigar Musaƣa: «Sǝn Ⱨarunƣa: ‹Ⱨasangni uzitip yǝrning topisiƣa urƣin. Buning bilǝn pütün Misir zeminidiki topa-qanglar paxiƣa aylinidu› dǝp eytⱪin» dedi. 13 Ular xundaⱪ ⱪildi. Ⱨarun ⱪolini uzitip ⱨasisi bilǝn yǝrdiki topiƣa ursa, adǝm wǝ ⱨaywanlarni paxa besip kǝtti. Pütün Misir zeminidiki ⱨǝmmǝ yǝrning topa-tozanliri paxiƣa aylandi. 14 Jadugǝrlǝr ɵz jadusi bilǝn paxa pǝyda ⱪilixⱪa tirixsimu, ularni pǝyda ⱪilalmidi. Paxilar ⱨǝm adǝmlǝrning, ⱨǝm ⱨaywanlarning üstibexini ⱪaplap kǝtti. 15 Jadugǝrlǝr Fir’ǝwngǝ: «Bu ixta Hudaning barmiⱪi bar» deyixti. Lekin Fir’ǝwn ⱪattiⱪ jaⱨilliⱪ ⱪilip, huddi Pǝrwǝrdigarning eytⱪinidǝk ularƣa ⱪulaⱪ salmidi.

16 Andin keyin Pǝrwǝrdigar Musaƣa mundaⱪ dedi: «Tang sǝⱨǝrdǝ ornungdin turup, Fir’ǝwn dǝryadin qiⱪⱪinida uning aldida turup, uningƣa: ‹Pǝrwǝrdigar mundaⱪ dǝydu: «Manga ibadǝt ⱪilixi üqün hǝlⱪimni ⱪoyup bǝrgin. 17 Əgǝr hǝlⱪimni ⱪoyup bǝrmisǝng, mana, Mǝn ɵzünggǝ, hizmǝtkarliring, hǝlⱪing wǝ ɵyliringgǝ qiwin topliri ǝwǝtimǝn. Xundaⱪki, Misirliⱪlarning ɵyliri wǝ ular turuwatⱪan tupraⱪmu qiwinlar bilǝn tolup taxidu. 18 Lekin u kündǝ Ɵz hǝlⱪim turuwatⱪan Goxǝn wilayitini ayrip ⱪoyimǝn. Xundaⱪki, u yǝrdǝ qiwin topliri tepilmaydu. Xuning bilǝn sǝn Mening bu zeminda Pǝrwǝrdigar ikǝnlikimni bilisǝn. 19 Bu tǝriⱪidǝ Ɵz hǝlⱪimni sening hǝlⱪingdin pǝrⱪlǝndürimǝn. Bu mɵjizilik karamǝt ǝtǝ kɵrülidu»› degin». 20 Pǝrwǝrdigar deginini ⱪildi. Qiwinlar top-top qiⱪip, Fir’ǝwn wǝ hizmǝtkarlirining ɵylirigǝ kirip, pütün Misir zeminini besip wǝyran ⱪildi. 21 Fir’ǝwn Musa wǝ Ⱨarunni qaⱪirtip, ularƣa: «Berip, muxu zeminda Hudayinglarƣa ⱪurbanliⱪ ɵtküzünglar» dedi. 22 Lekin Musa jawab berip: «Undaⱪ ⱪilix toƣra bolmaydu, qünki biz Pǝrwǝrdigar Hudayimiz üqün ⱪilidiƣan ⱪurbanliⱪ Misirliⱪlarƣa yirginqlik kɵrünidu. Əmdi biz Misirliⱪlarning kɵz aldida ular yirginqlik kɵrgǝn nǝrsini ⱪurbanliⱪ ⱪilsaⱪ, ular bizni qalma-kesǝk ⱪiliwǝtmǝmdu? 23 Buning üqün biz qɵl-bayawanƣa berip üq künlük yol mengip, Pǝrwǝrdigar Hudayimiz bizgǝ buyruƣinidǝk Uningƣa ⱪurbanliⱪ ⱪiliximiz kerǝk» dedi. 24 Fir’ǝwn: «Silǝrning Hudayinglar Pǝrwǝrdigar üqün qɵl-bayawanda ⱪurbanliⱪ ɵtküzgili berixinglarƣa ijazǝt berimǝn. Lekin bǝk yiraⱪ ketip ⱪalmanglar. Mǝn üqün du’a ⱪilinglar» dedi. 25 Musa jawab berip: «Mana, mǝn sening aldingdin qiⱪip, Pǝrwǝrdigardin: ‹Ətǝ qiwin topliri Fir’ǝwn, hizmǝtkarliri wǝ hǝlⱪidin qiⱪip kǝtsun› dǝp tilǝp du’a ⱪilimǝn. Lekin Fir’ǝwn yǝnǝ ⱨiyligǝrlik ⱪilip, hǝlⱪni Pǝrwǝrdigarƣa ⱪurbanliⱪ ⱪilƣili berixtin tosmisun» dedi. 26 Musa Fir’ǝwnning aldidin qiⱪip, Pǝrwǝrdigarƣa yalwurup du’a ⱪildi. 27 Pǝrwǝrdigar Musa tiliginidǝk ⱪilip, Fir’ǝwn, hizmǝtkarliri wǝ hǝlⱪtin qiwin toplirini qiⱪiriwǝtti. Xundaⱪki, bir talmu ⱪalmidi. 28 Lekin Fir’ǝwn bu nɵwǝtmu ⱪattiⱪ jaⱨilliⱪ ⱪilip, hǝlⱪni ⱪoyup bǝrmidi.