1 Mana, uni boysundurux hiyali yoⱪⱪa qiⱪidu.

Bir ⱪaraxtila uningdin ümid üzülidu.

2 Ⱨeqⱪandaⱪ palwan uni yiⱪitixⱪa jür’ǝt ⱪilalmisa,

undaⱪta Mening aldimda kim turalaydu?

3 Mǝn ⱪayturƣudǝk kim Manga bir nǝrsǝ bǝrgǝn?

Asmanning tegidiki ⱨǝmmǝ nǝrsǝ Meningkidur.

4 Əmma bu ⱨaywanning ǝzaliri, zor küqi

wǝ qirayliⱪ tüzülüxi toƣrisida sɵz bolsa, mǝn süküttǝ turmaymǝn.

5 Kim uning tonini salduralaydu?

Kim ⱪox ⱪatliⱪ qixlirining arisiƣa kirgili jür’ǝt ⱪilaydu?

6 Uning ⱪatar-ⱪatar qixliri wǝⱨimilik bolƣaq,

kim uning aƣzining ixiklirini aqalaydu?

7 Uning ⱪasiraⱪlirining rǝtlik sǝpliri

mɵⱨür besilƣandǝk qing qaplaxturulƣan.

8 Ular bir-birigǝ arisiƣa xamal kirmigüdǝk tǝriⱪidǝ ⱨim yepixⱪan.

9 Ular bir-birigǝ qaplaxⱪandur,

ajrimaydiƣan tǝriⱪidǝ bir-birigǝ ilixⱪandur.

10 U qüxkürsǝ nur qaⱪnaydu,

uning kɵzliri sǝⱨǝrning kirpikliridǝktur.

11 Uning aƣzidin ot yalⱪunliri qaqrap turidu,

ot uqⱪunliri etilip qiⱪidu.

12 Kɵyüwatⱪan ⱪomux üstidǝ ⱪaynawatⱪan ⱪazandin ⱨor qiⱪⱪandǝk

uning burun tɵxükliridin tütün qiⱪidu.

13 Uning tiniⱪi kɵmürni qoƣ ⱪilidu,

aƣzidin yalⱪunlar qiⱪidu.

14 Uning boynida küq yatidu,

dǝⱨxǝt uning aldida sǝkrǝydu.

15 Ⱪorsiⱪining türülgǝn ǝtliri bir-birigǝ qaplixip,

uningƣa mǝⱨkǝm yipixip, midirlimay turidu.

16 Uning yüriki taxtǝk ⱪattiⱪ bolup,

tügmǝnning ǝng astidiki texidǝk mustǝⱨkǝmdur.

17 U ornidin ⱪozƣalsa, palwanlar ⱪorⱪup ketip,

wǝⱨimidin parakǝndǝ bolup ketidu.

18 Uningƣa tǝgkǝn ⱪiliq, nǝyzǝ, ya oⱪi yaki hǝnjǝr

uni ⱨeqnemǝ ⱪilmaydu.

19 U tɵmürni saman,

misni por yaƣaq sanaydu.

20 Yaning oⱪi uni ⱪaquralmaydu,

salƣa taxliri uning aldida samanƣa aylinidu.

21 U toⱪmaⱪlarni pahal sanaydu,

nǝyzining pulanglixiƣa külidu.

22 Uning asti sunuⱪ sapalning ɵtkür ⱪirliridǝktur,

u patⱪaⱪtin haman ƣaltikidǝk iz ⱪaldurup ɵtidu.

23 U qongⱪur sularni bir ⱪazandǝk ⱪaynitiwetidu,

dengizni ⱪazandiki mǝlⱨǝmdǝk waraⱪxitidu.

24 Qongⱪur sular huddi qaqliri aⱪarƣandǝk,

arⱪisidiki yolini kɵpüklǝxtürüp aⱪartip taxlaydu.

25 Yǝr yüzidǝ uning tǝngdixi yoⱪtur.

U ⱪorⱪmas yaritilƣan.

26 U yoƣan ⱨǝr nǝrsigǝ ⱪorⱪmay ⱪaraydu.

U ⱨǝmmǝ mǝƣrur ⱨaywanlarning padixaⱨidur».