Əyyubning towa ⱪilixi
42
1 Andin Əyyub Pǝrwǝrdigarƣa jawab berip mundaⱪ dedi: 2 «Sening ⱨǝmmǝ ixlarƣa ⱪadir ikǝnlikingni,
ⱪararliringning tosⱪunsizliⱪini bilimǝn.
3 ‹Ⱨekmitimni ǝⱪilsizliⱪi bilǝn hirǝlǝxtürgǝn kim?› dǝp soriding.
Ⱨǝⱪiⱪǝtǝn mǝn qüxǝnmigǝn nǝrsilǝr toƣrisida gǝp ⱪildim,
ǝⱪlim yǝtmigǝn, ɵzüm bilmigǝn ajayip ixlar toƣrisida sɵzlidim.
4 Sǝn: ‹Əmdi anglisang, Mǝn sɵzlǝp berǝy.
Mǝn sǝndin so’al soraymǝn, sǝn Manga jawab bǝr› deding.
5 Sǝn toƣruluⱪ ⱪuliⱪimning angliƣinila bilǝttim,
biraⱪ ⱨazir mening kɵzüm Seni kɵrdi.
6 Xuning üqün mǝn ɵzümdin nǝprǝtlinip, puxayman ⱪilimǝn.
Kül-topida yetip towa ⱪilimǝn».
Pǝrwǝrdigarning Əyyubⱪa awwalⱪidinmu kɵp bǝrikǝt ata ⱪilixi
7 Pǝrwǝrdigar Əyyubⱪa mǝzkur sɵzlǝrni ⱪilƣandin keyin, temanliⱪ Elifazƣa ⱪarap mundaⱪ dedi: «Mening ƣǝzipim sanga wǝ sening ikki dostungƣa ⱪarxi ⱪozƣaldi, qünki silǝr Mening ⱨǝⱪⱪimdǝ hizmǝtkarim Əyyubtǝk toƣra gǝp ⱪilmidinglar. 8 Silǝr ǝmdi ɵzünglar üqün yǝttǝ torpaⱪ wǝ yǝttǝ ⱪoqⱪarni elip, hizmǝtkarim Əyyubning yeniƣa berip, kɵydürmǝ ⱪurbanliⱪ ɵtküzünglar. Hizmǝtkarim Əyyub bolsa silǝr üqün du’a ⱪilsun, qünki Mǝn pǝⱪǝt uning du’asini anglaymǝn. Bolmisa hizmǝtkarim Əyyub ⱪilƣandǝk Mǝn toƣruluⱪ toƣra gǝp ⱪilmiƣininglar üqün, ⱪilƣan ⱨamaⱪǝtlikinglar üqün silǝrgǝ jaza berimǝn». 9 Xuning bilǝn temanliⱪ Elifaz, xu’aⱨliⱪ Bildad wǝ na’amatliⱪ Zofar berip, Pǝrwǝrdigar ularƣa buyruƣanlarni orunlidi. Andin Pǝrwǝrdigar Əyyubning du’asini ⱪobul ⱪildi.
10 Əyyub dostliri üqün du’a ⱪilƣandin keyin, Pǝrwǝrdigar uni dǝrd-ǝlǝmdin ⱪutⱪuzup ǝsligǝ kǝltürdi. Pǝrwǝrdigar uning mal-mülkini ilgirikidin ikki ⱨǝssǝ kɵpǝytip bǝrdi. 11 U qaƣda uning ⱨǝmmǝ aka-ukiliri, ⱨǝmmǝ aqa-singilliri wǝ ilgiriki ⱨǝmmǝ dost-aƣiniliri uning yeniƣa kelip, uning ɵyidǝ nan yeyixip, Pǝrwǝrdigar uning üstigǝ kǝltürgǝn bala-ⱪazalar toƣrisida uningƣa iq aƣritip tǝsǝlli bǝrdi. Ularning ⱨǝrbiri uningƣa bir taldin kümüx tǝnggǝ wǝ bir altun üzük bǝrdi.
12 Pǝrwǝrdigar Əyyubⱪa awwalⱪidinmu kɵp bǝrikǝt ata ⱪildi. Uning on tɵt ming ⱪoyi, altǝ ming tɵgisi, ming jüp ɵküzi wǝ ming mada exiki bar boldi. 13 Uning yǝttǝ oƣli wǝ üq ⱪizi tuƣuldi. 14 Birinqi ⱪizining ismini Yemima, ikkinqisining Kǝziya wǝ üqinqisining ismini Kǝrǝn-Happuⱪ dǝp ⱪoydi. 15 Pütkül zeminda Əyyubning ⱪizliridǝk güzǝl ⱪizlar tepilmaytti. Atisi ularƣa aka-ukiliriƣa ohxax miras ⱪaldurdi.