Əyyubning Pǝrwǝrdigarƣa jawab berixi
40
1 Pǝrwǝrdigar Əyyubⱪa yǝnǝ sɵz ⱪilip: 2 «Talax-tartix ⱪilƣuqi ⱨǝmmigǝ ⱪadir Huda bilǝn dǝwalaxmaⱪqimu?
Hudani ǝyibligüqi jawab bǝrsun» dedi.
3 Andin Əyyub Pǝrwǝrdigarƣa jawab berip:
4 «Mana, mǝn layiⱪ ǝmǝs turup,
Sanga ⱪandaⱪmu jawab berǝlǝymǝn?
Aƣzimni ⱪolum bilǝn etiwalimǝn.
5 Mǝn bir-ikki ⱪetim sɵzlidim, biraⱪ ǝmdi jawab berǝlmǝymǝn,
mǝn yǝnǝ sɵzlimǝymǝn» dedi.
Pǝrwǝrdigarning Əyyubⱪa bǝrgǝn ikkinqi jawabi
6 Andin Pǝrwǝrdigar ⱪuyunning iqidin Əyyubⱪa jawab berip mundaⱪ dedi:
7 «Sǝn ǝrkǝktǝk belingni baƣla.
Əmdi Mǝn sǝndin so’al soraymǝn, sǝn manga jawab bǝr.
8 Sǝn mening ⱨɵkümümni bikar ⱪilmaⱪqimusǝn?
Meni ǝyiblǝp, ɵzüngni aⱪlimaⱪqimusǝn?
9 Sening Hudaning bilikidǝk biliking barmu?
Sǝn Uningdǝk awazingni güldürlitǝlǝmsǝn?
10 Undaⱪ bolsa, ǝmdi ɵzüngni izzǝt wǝ ⱨǝywǝt bilǝn zinnǝtlǝndürüp,
xan-xǝrǝp wǝ xǝwkǝtkǝ pürkinip,
11 ƣǝzipingning ⱪǝⱨrini qeqip,
ⱨǝmmǝ tǝkǝbburlarƣa nǝziringni selip
ularni pǝslǝxtür.
12 Ⱨǝrbir tǝkǝbburƣa nǝzǝr selip, uni bax ǝgdür,
yamanlarni turƣan jayida yǝr bilǝn yǝksan ⱪil.
13 Ularning ⱨǝmmisini topiƣa kɵm,
yoxurun jayda yüzlirini yɵgǝp ⱪoy.
14 Xundaⱪ ⱪilalisang,
‹Ong ⱪolung seni ⱪutⱪuzalaydu› dǝp tǝn alimǝn. ◼
15 Mana, Mǝn sening bilǝn tǝng yaratⱪan begimotⱪa ⱪariƣin.
U kalidǝk ot-qɵp yǝydu. ◼
16 Ⱪarap baⱪ, uning küqi belididur,
ⱪuwwiti ⱪorsiⱪining muskullirididur.
17 U ⱪuyruⱪini bir kedir dǝrihidǝk pulangxitidu,
putlirining pǝyliri bir-birigǝ qing toⱪulƣan,
18 Uning ustihanliri mis tayaⱪlardǝktur,
uning putlirining sɵngǝkliri tɵmür toⱪmaⱪlardǝktur.
19 U Huda yaratⱪan mǝhluⱪatlarning bexidur,
pǝⱪǝt uning Yaratⱪuqisila uningƣa ⱪiliqini kɵtürǝlǝydu.
20 Yawayi ⱨaywanlar oynap yüridiƣan taƣlar
uning rizⱪini qiⱪirip beridu.
21 U sayiliⱪ dǝrǝhlǝr tegidǝ yatidu,
ⱪomuxluⱪ wǝ sazliⱪning iqidǝ yoxurunidu.
22 Sayiliⱪ dǝrǝhlǝr uni sayisi bilǝn yapidu,
eriⱪ boyidiki sɵgǝtlǝr uni oriwalidu.
23 Əgǝr dǝrya texip kǝtsimu, u ürkümaydu,
I’ordanning süyi uning aƣziƣiqǝ ɵrlisimu, u hatirjǝm turidu.
24 Insan uning aldiƣa qiⱪip uni tutalamdu?
Uning burnini texip ⱨalⱪa ɵtküzǝlǝmdu?
25 Lewi’atan degǝn ⱨaywanni ⱪarmaⱪ selip tartalamsǝn?
Arƣamqa bilǝn uning tilini boƣalalamsǝn? ◼
26 Sǝn uning burniƣa ⱪomux ⱨalⱪa ɵtküzülǝmsǝn?
Uning engikini nǝyzǝ bilǝn texǝlǝmsǝn?
27 U sanga arⱪa-arⱪidin yalwuramdu?
U sanga siliⱪ gǝp ⱪilamdu?
28 U sǝn bilǝn ǝⱨdǝ tüzüp,
ⱨǝmixǝ sanga ⱪul bolamdu?
29 Sǝn ⱪuxⱪaq bilǝn oynaxⱪandǝk uning bilǝn oynixamsǝn?
Sǝn uni baƣlap ⱪizliringƣa berǝlǝmsǝn?
30 Beliⱪqilar uning üstidǝ sodilixamdu?
Uni sodigǝrlǝrgǝ bɵlüxtürüp berǝmdu?
31 Sǝn uning terisini nǝyzilǝr bilǝn,
uning bexini beliⱪqining arisi bilǝn sanjip tolduralamsǝn?
32 Sǝn ⱪolungni uning üstigǝ ⱪoyup soⱪuxup baⱪⱪin.
Ikkinqi mundaⱪ ⱪilmaysǝn.