39
1 Sǝn taƣdiki yawa ɵqkilǝrning ⱪaqan tuƣidiƣanliⱪini bilǝmsǝn? Marallarning ⱪozilixini sǝn kɵzitǝmsǝn?
2 Ularning boƣaz bolidiƣan aylirini ⱨesabliyalamsǝn?
Ularning tuƣidiƣan waⱪtini bilǝmsǝn?
3 Ular engixip balilirini tuƣup,
tolƣiⱪidin ⱪutulidu.
4 Ularning baliliri oquⱪ dalada ɵsüp küqlinidu.
Ular kǝtkǝndin keyin tǝkrar ⱪaytip kǝlmǝydu.
5 Yawa exǝkni kim ǝrkin ⱪoyuwǝtkǝn?
Kim xax exǝkning baƣlirini yǝxkǝn?
6 Mǝn bayawanni uning ɵyi ⱪildim,
xorluⱪni uningƣa makan ⱪilip bǝrdim.
7 U xǝⱨǝrning warang-qurungliriƣa külidu,
ⱨǝydigüqining warⱪixinimu anglimaydu.
8 Uning yayliⱪi taƣlarning arisididur,
u xu yǝrdǝ ot-giyaⱨlarni izdǝp yüridu.
9 Yawa buⱪa sanga boysunuxni halamdu? U sening oⱪurungda ⱪonamdu?
10 Sǝn yawa buⱪini tana bilǝn baƣlap, sapanƣa ⱪatalamsǝn?
U sanga ǝgixip wadilarda yǝr aƣduramdu?
11 Uning küqi qong bolƣini üqün sǝn uningƣa tayinamsǝn?
Yaki sǝn ixingni uningƣa tapxuralamsǝn?
12 Uning axliⱪni ɵygǝ elip kelidiƣanliⱪiƣa,
ⱨosulni yiƣip, hamanƣa toxuydiƣanliⱪiƣa ixǝnǝmsǝn?
13 Tɵgiⱪux huxalliⱪta ⱪanatlirini ⱪaⱪidu,
biraⱪ uning ⱪanatliri lǝylǝkningki bilǝn selixturƣili bolmaydu.
14 Qünki u tuhumlirini yǝrgǝ taxlap ⱪoyup,
ularni ⱪumning iqidǝ ⱪizitidu,
15 lekin: ‹Ular ayaƣ astida yanjilip ketǝrmikin›,
yaki ‹Daladiki yawayi ⱨaywanlar ularni dǝssǝp eziwetǝrmikin›
dǝp oylimaydu.
16 U baliliriƣa ɵzining baliliri ǝmǝstǝk baƣrini ⱪattiⱪ ⱪilidu,
ɵz uruⱪining yoⱪ bolup ketixining ǝndixisini ⱪilmaydu.
17 Qünki Huda uni ⱨekmǝttin mǝⱨrum ⱪilƣan,
uningƣa ǝⱪil-parasǝt ata ⱪilmiƣan.
18 Ⱨalbuki u ⱪanatlirini yeyip sǝkrigǝndǝ,
atⱪa ⱨǝm uning mingüqisigǝ külidu.
19 Atⱪa sǝn küq bǝrgǝnmu?
Uning boyniƣa yǝlpünüp turidiƣan yaylini sǝn kiygüzgǝnmu?
20 Sǝn uni qekǝtkidǝk sǝkritǝlǝmsǝn?
Uning ⱨǝywǝtlik kixnǝxliri wǝⱨimiliktur.
21 U wadida yǝrni tepip, küqidin hux bolup,
ⱪoralliⱪ ⱪoxun bilǝn uqrixixⱪa atlinidu.
22 U ⱪorⱪunqni mǝshirǝ ⱪilip, ⱨeqnemidin ⱪorⱪmaydu.
U ⱪiliqtin ⱪeqip arⱪiƣa yanmaydu.
23 Uning qɵrisidǝ oⱪdan, parⱪiraydiƣan hǝnjǝr
wǝ nǝyzǝ
taraⱪxip tursimu,
24 u ⱨayajanlinip, aqqiⱪida yǝrni tatlap yutuwetidu.
Burƣining awazi anglansa, ɵzini tutalmaydu. ◼
25 Burƣilar qelinsa, u «ⱨay ⱨay» dǝp kixnǝydu.
U yiraⱪtin jǝng puriⱪini purap,
sǝrdarlarning warⱪirixini wǝ jǝng quⱪanlirini anglaydu.
26 Sening ⱨekmiting bilǝn ⱪarqiƣa egiz uqup
ⱪanatlirini jǝnubⱪa ⱪarap aqamdu?
27 Bürküt sening buyruⱪung bilǝn yuⱪiriƣa qiⱪip
uwisini egizliktǝ yasamdu?
28 U ⱪoram taxni makan ⱪilidu,
ⱪiya tax wǝ tik taƣning qoⱪⱪisiƣa uwisini ⱪuridu.
29 Xu yǝrdin u owni paylap turidu,
kɵzliri bilǝn yiraⱪlarni kɵzitidu.
30 Uning balilirimu ⱪan xoraydu,
ɵlüklǝr ⱪayǝrdǝ bolsa u xu yǝrdǝ bolidu».