Pǝrwǝrdigarning Əyyubⱪa bǝrgǝn birinqi jawabi
38
1 Bu qaƣda Pǝrwǝrdigar ⱪuyun iqidin Əyyubⱪa jawab berip mundaⱪ dedi: 2 «Ⱨekmitimni ǝⱪilsiz sɵzlǝr bilǝn ⱪaraytⱪan kim?
3 Əmdi bir ǝr kixidǝk belingni baƣla.
Mǝn sǝndin so’al soraymǝn, sǝn manga jawab bǝr.
4 Mǝn yǝrning ulini ⱪoyƣanda sǝn ⱪǝyǝrdǝ iding?
Əgǝr xunqǝ ǝⱪil-parasiting bolsa, bayan ⱪil.
5 Kim uning ɵlqimini bekitti? Sǝn bilmǝmsǝn?
Kim uning üstigǝ ɵlqǝx tanisini tartip ⱪoydi?
6 Yǝrning ulliri nemining üstigǝ tohtitilƣan?
Kim Uning burjǝk texini ⱪoydi?
7 U ⱪoyulƣanda tang yultuzliri birliktǝ nahxa yangratti,
‹Hudaning oƣulliri›ning ⱨǝmmisi xadliⱪtin quⱪan saldi. ◼
8 Kim dengizni ixiklǝr bilǝn taⱪidi
u ⱪorsaⱪtin qiⱪⱪandǝk etilip qiⱪⱪanda?
9 Mǝn bulutni uningƣa kiyim ⱪilƣanda,
zulmǝt ⱪarangƣuluⱪ bilǝn uni zakiliƣanda,
10 uning üqün qǝklirini bekitip,
taⱪaⱪ wǝ ixiklǝr ⱪoyƣanda,
11 ‹Bu yǝrgiqǝ kelip, uningdin aldiƣa ɵtmǝysǝn,
kibir dolⱪunliring bu yǝrdǝ tohtaydu› deginimdǝ,
sǝn ⱪǝyǝrdǝ iding?
12 Sǝn ɵmrüngdǝ sǝⱨǝrgǝ ǝmir ⱪilip baⱪtingmu?
Sǝn süzülgǝn tangƣa uning jayini kɵrsitip baⱪtingmu?
13 Sǝn uningƣa: ‹Sǝn yǝrni uqliridin tutup,
yamanlarni uningdin irƣitiwǝtkin› dǝp eyttingmu?
14 Lay tamƣa bilǝn xǝkillǝndürülgǝndǝk,
yǝrmu tang nurida xǝkillǝndürülüp, bir libastǝk otturiƣa qiⱪidu.
15 Yamanlarning nuri eliwelinidu,
egiz kɵtürülgǝn ⱪol sundurulidu. ◼
16 Sǝn dengizning bulaⱪliriƣiqǝ qüxtüngmu,
qongⱪur sularning tegidǝ mengip baⱪtingmu?
17 Ɵlümning dǝrwaziliri sanga axkarilandimu,
ɵlüm sayisining dǝrwazilirini kɵrdüngmu?
18 Yǝr yüzining kǝnglikini bayⱪidingmu?
Əgǝr buning ⱨǝmmisini bilsǝng, bayan ⱪil.
19 Nurning makaniƣa baridiƣan yol nǝdǝ?
Ⱪarangƣuluⱪning turar jayi ⱪǝyǝrdǝ?
20 Sǝn ularni ɵz makanliriƣa elip baralamsǝn?
Ɵylirigǝ baridiƣan yollirini tapalamsǝn?
21 Sǝn u waⱪitta tuƣulƣaqⱪa,
künliringning sani kɵp bolƣaqⱪa,
sǝn ǝlwǝttǝ bilisǝn!
22 Sǝn ⱪarning hǝzinilirigǝ kirgǝnmu?
Mɵldürning ambarlirini kɵrgǝnmu?
23 Mǝn bularni azab-oⱪubǝtliⱪ zaman üqün saⱪlap ⱪoydum,
urux wǝ jǝng küni üqün tǝyyarlap ⱪoydum.
24 Nur ⱪandaⱪ yollar bilǝn qeqilidu?
Xǝrⱪ xamili ⱪandaⱪ yollar bilǝn yǝr yüzigǝ tarⱪitilidu?
25 Kim kǝlkün süyi üqün bir ɵstǝng qapidu?
Kim güldürmamining qaⱪmiⱪi üqün bir yol aqidu?
26 Kim adǝm yaximaydiƣan zeminƣa,
ⱨeqkim turmaydiƣan qɵl-bayawanƣa yamƣur yaƣdurup,
27 qɵllǝxkǝn ⱪaⱪas yǝrlǝrni ⱪandurup,
yengi ot-qɵp ündüridu?
28 Yamƣurning atisi barmu?
Xǝbnǝm tamqilirini kim pǝyda ⱪilidu?
29 Muz kimning ⱪorsiⱪidin qiⱪidu?
Ⱨawaning ⱪirowini kim dunyaƣa kǝltüridu?
30 U qaƣda sular taxtǝk ⱪetip ⱪalidu,
qongⱪur sularning yüzi tonglap ⱪalidu.
31 Sǝn yǝttǝ Ükǝr yultuz türkümining zǝnjirini baƣliyalamsǝn?
Ori’on yultuz türkümining baƣlirini boxitalamsǝn?
32 Sǝn yultuz türkümlirini ɵz pǝslidǝ qiⱪiralamsǝn?
Qong Eyiⱪ yultuz türkümini ɵz baliliri bilǝn yetǝkliyǝlǝmsǝn?
33 Sǝn asmanning ⱪanuniyǝtlirini bilǝmsǝn?
uning sǝltǝnitini yǝr yüzidǝ ornitalamsǝn?
34 Seni besip kǝtküdǝk taxⱪin kǝltüridiƣan bulutlarƣa
awazingni anglitalamsǝn?
35 Sǝn qaⱪmaⱪlarni ǝwǝtip, ularƣa buyruⱪ berǝlǝmsǝn?
Ular sanga: ‹Mana biz tǝyyar› dǝp awab berǝmdu?
36 Kɵngülgǝ kim ⱨekmǝt ⱪoyƣan?
Oylirimizƣa kim ǝⱪil-parasǝt bergǝn?
37 Kim ɵz danaliⱪi bilǝn bulutlarni saniyalaydu?
Kim asmanning su tulumlirini tɵküp,
38 topa-qanglarni ilǝxtürüp ⱪaturup, qalmilarni bir-birigǝ yepixturidu?
39 Sǝn qixi xir üqün ow owliyalamsǝn?
Yax xirlarning ⱪarnini toyƣuzalamsǝn?
40 Ular ɵngkürlirida mɵkünüp yatⱪanda
yaki bɵktürmidǝ marap yatⱪanda,
sǝn ularning aqliⱪini ⱪanduralamsǝn?
41 Ⱪuzƣunning baliliri aqliⱪtin Hudaƣa pǝryad ⱪilƣanda
,
ⱪuzƣunning rizⱪini kim beridu?