1 Xu sǝwǝbtin yürikim ⱪattiⱪ soⱪup,

ⱪepidin qiⱪip ketǝy dedi.

2 Angla Uning küqlük awazini,

aƣzidin qiⱪⱪan güldürlǝxni.

3 U awazini pütün asman astidiki ⱨǝr yǝrgǝ yǝtküzüp,

qaⱪmaⱪlirini yǝrning ǝng qǝtlirigiqǝ ǝwǝtidu.

4 Qaⱪmaⱪtin keyin Uning küqlük awazi anglinidu,

U ⱨǝywǝtlik awazi bilǝn güldürlǝydu.

Uning awazi anglanƣanda U qaⱪmaⱪlarni tohtitip ⱪoymaydu.

5 Huda ajayip awazi bilǝn güldürlǝydu,

U bizning ǝⱪlimiz yǝtmǝydiƣan uluƣ ixlarni ⱪilidu.

6 Mana, U ⱪarƣa: ‹Yǝrgǝ qüx› dǝp buyruydu,

xar-xur yamƣurƣa ‹Yǝrgǝ tɵkül› dǝp buyruⱪ beridu.

7 U adǝmlǝr ɵz yaratⱪuqisining ixlirini bilsun dǝp,

ⱨǝmmǝ insanning ⱪollirini mɵⱨürlǝp ⱪoyidu. ^◼  

8 U waⱪitta yawayi ⱨaywanlar ɵz uwiliriƣa kiriwalidu,

ular ɵz ƣarida yetiwalidu.

9 Jǝnub tǝrǝptin boran qiⱪidu,

ximal tǝrǝptin soƣuⱪ kelidu.

10 Hudaning püwlixi bilǝn muz pǝyda bolidu,

bipayan sular muzƣa aylinidu.

11 U ⱪelin bulutⱪa nǝmlikni yüklǝydu,

qaⱪmaⱪ qaⱪidiƣan bulutlarni yayidu.

12 Ular uning iradisi bilǝn ⱨǝryan qepip,

Uning buyruⱪini yǝr yüzidǝ orunlaydu.

13 Mǝyli jaza üqün bolsun,

mǝyli yǝrning paydisi üqün bolsun,

mǝyli rǝⱨimdilliⱪini kɵrsitixi üqün bolsun

U ularni ǝwǝtidu.

14 Əy Əyyub, buningƣa ⱪulaⱪ selip xük turƣin,

Hudaning ajayip ixlirini oyliƣin.

15 Hudaning ularning yürüxini ⱪandaⱪ baxⱪuridiƣanliⱪini,

bulutlirining qaⱪmaⱪlirini ⱪandaⱪ qaⱪturidiƣanliⱪini bilǝmsǝn?

16 Sǝn bulutlarning ⱨawa boxluⱪida ⱪandaⱪ turidiƣanliⱪini,

bilimi mukǝmmǝl bolƣan Hudaning ajayip ixlirini bilǝmsǝn?

17 U jǝnub xamili bilǝn yǝrni tinqlandurup,

kiyimliringni ⱪandaⱪ issitⱪinini bilǝmsǝn?

18 Əynǝkkǝ ohxax ⱪuyulup mustǝⱨkǝm ⱪilinƣan asman gümbizini

sǝn Uningƣa ⱨǝmraⱨ bolup yaydingmu?

19 Uningƣa nemǝ deyiximiz kerǝklikini bizgǝ ɵgǝt.

Qünki biz bu ⱪarangƣuluⱪta nemǝ deyixni bilǝlmiduⱪ.

20 Mǝn Uningƣa gǝp ⱪilmaⱪqi bolsam,

Uningƣa hǝwǝr berix kerǝkmu?

Undaⱪ gǝp ⱪilƣuqi ⱨalakǝtkǝ qüxmǝmdu?

21 Adǝm bulutning üstidiki parⱪirap turƣan ⱪuyax nurini kɵrǝlmǝydu.

Lekin xamal qiⱪip, bulutlarni ⱨǝydiwǝtsǝ,

22 altun nur ximaldin kɵrünidu,

Hudaning uluƣ ⱨǝywiti namayan bolidu.

23 Ⱨǝmmigǝ ⱪadir Hudani biz qüxinǝlmǝymiz.

U ⱪuwwǝttǝ uluƣ bolup,

ⱨǝⱪⱪaniyliⱪi wǝ tǝngdaxsiz adalitidin ⱨǝrgiz qǝtnimǝs.

24 Xu sǝwǝbtin adǝmlǝr Uningdin ⱪorⱪidu.

Kɵnglidǝ ɵzini dana ⱨesabliƣan ⱨeqbirigǝ U etibar ⱪilmaydu».