Eliⱨuning tɵtinqi sɵzi
36
1 Eliⱨu sɵzini dawamlaxturup mundaⱪ dedi: 2 «Sanga jawab berixim üqün azƣinǝ sǝwr ⱪilƣin,
qünki Huda ⱨǝⱪⱪidǝ tehi eytidiƣan gǝplirim bar.
3 Bilimimni yiraⱪlardin elip kelip,
Yaratⱪuqimning ⱨǝⱪⱪaniyliⱪini kɵrsitǝy.
4 Xübⱨisiz sɵzlirim yalƣan ǝmǝs,
qünki bilimi mukǝmmǝl bir kixi aldingda turidu.
5 Mana, Huda uluƣ bolsimu,
Uning ǝⱪil-parasiti qǝksiz bolsimu,
U ⱨeqkimni kǝmsitmǝydu.
6 U yaman kixini yaxatmaydu,
biraⱪ biqarilǝrgǝ ⱨǝⱪⱪini beridu.
7 U ⱨǝⱪⱪaniylardin kɵzlirini almaydu,
bǝlki ularni padixaⱨlar bilǝn billǝ tǝhtkǝ olturƣuzidu.
U ularni ǝbǝdkiqǝ yuⱪiri kɵtüridu.
8 Əgǝr ular zǝnjir bilǝn baƣlinip,
dǝrd-ǝlǝmning yipliriƣa qigilip ⱪalƣan bolsa,
9 U ularƣa ɵz ⱪilmixlirini,
tǝkǝbburlixip kǝtkǝndǝ ⱪilƣan gunaⱨlirini kɵrsitidu. ◼
10 U ularning ⱪulaⱪlirini ibrǝtkǝ eqip,
ularƣa yamanliⱪliridin ⱪaytixni buyruydu.
11 Əgǝr ular ⱪulaⱪ selip Uningƣa boysunsa,
künlirini xadliⱪta, yillirini bǝht-sa’adǝt iqidǝ ɵtküzidu.
12 Lekin ular Uningƣa ⱪulaⱪ salmisa,
ular ⱪiliqtin ⱨalak bolidu,
ǝⱪil-idraksiz alǝmdin ɵtidu.
13 Kɵngli buzuⱪ bolƣanlar bolsa ƣǝzipini toplaydu.
Huda ularni asarǝtkǝ qüxürsimu,
ular Uningƣa pǝryad ⱪilmaydu.
14 Ular yax waⱪtida ɵlidu,
ularning ⱨayati napaklar arisida tügǝydu.
15 Pǝrwǝrdigar dǝrdmǝnni dǝrd arⱪiliⱪ ⱪutⱪuzidu,
zulum arⱪiliⱪ ularning ⱪulaⱪlirini aqidu.
16 Xundaⱪtimu U seni azab-oⱪubǝttin tartip qiⱪirip,
ⱪistangqiliⱪi yoⱪ kǝngri yǝrgǝ baxlimaⱪqi.
U seni yaƣliⱪ ta’amlar bilǝn toldurulƣan
dastihini bar bir yǝrgǝ elip barmaⱪqi.
17 Sǝn bolsang pǝⱪǝtla yamanlarning dǝwalirini oylap yürisǝn.
Lekin ⱨɵküm wǝ adalǝt bir-birigǝ baƣlanƣan. ◼
18 Ƣǝziping seni mǝshirigǝ elip barmisun,
Undaⱪ ⱪilsang qong kapalǝtmu seni ⱪutⱪuzalmaydu.
19 Sening bayliⱪing ɵzüngni dǝrd-ǝlǝmdin saⱪliyalamdu?
Pütün küqüng bilǝn tirixsǝngmu sanga payda tegǝmdu?
20 Sǝn hǝlⱪlǝr ɵz jayidin yulup taxlinidiƣan
keqigǝ ümid baƣlimiƣin.
21 Ⱨuxyar bol, yamanliⱪⱪa burulma,
uni dǝrd-ǝlǝmdin artuⱪ kɵrmǝ.
22 Mana, Huda Ɵz küq-ⱪudriti bilǝn üstündur.
Uningdǝk ɵgǝtküqi barmu?
23 Kim Uningƣa yolini bildürǝlǝydu?
Kim Uningƣa: ‹Sǝn natoƣra ix ⱪilding› deyǝlǝydu?
24 Sǝn adǝmlǝr nahxa eytip mǝdhiyilǝydiƣan
Hudaning ixlirini uluƣlaxni untumiƣin.
25 Pütün insanlar Uning ixlirini kɵrüp turidu,
adǝm baliliri ularƣa yiraⱪtin ⱪaraydu.
26 Bǝrⱨǝⱪ, Huda uluƣdur, biz Uni qüxinǝlmǝymiz,
Uning yillirining sani san-sanaⱪsizdur.
27 Mana, U su tamqilirini parƣa aylanduridu.
Ular kɵpiyip, yamƣur bolup yaƣidu.
28 Bulutlar ularni temitip,
adǝmlǝrning üstigǝ kǝngriqilik bilǝn yaƣduridu.
29 Kim bulutlarning yeyilixini,
kim Uning qediridin qiⱪⱪan güldürlixini qüxinǝlǝydu?
30 Mana, Huda qɵrisigǝ Ɵz nurini qeqidu.
U dengizning tegini ⱪaplaydu. ◼
31 U bular arⱪiliⱪ hǝlⱪlǝr üstidin ⱨɵküm ⱪilidu,
ⱨǝm kǝngriqilik bilǝn ularning rizⱪini beridu.
32 U ⱪollirini qaⱪmaⱪ bilǝn toldurup,
uning ⱪǝyǝrgǝ qüxüxini buyruydu.
33 Uning güldürmamisi uning kelidiƣanliⱪini elan ⱪilidu.
ⱨǝtta qarwilarmu boran kelidiƣinidin hǝwǝr beridu.