1 Eliⱨu sɵzigǝ dawam ⱪilip mundaⱪ dedi:

2 «‹Mǝn Huda aldida ⱨǝⱪliⱪmǝn›

deginingni toƣra dǝp oylamsǝn?

3 Sǝn tehi: ‹Gunaⱨ ⱪilƣinimƣa ⱪariƣanda gunaⱨ ⱪilmiƣinimning

manga nemǝ paydisi bar?

Nemǝ mǝnpǝ’ǝti bar?› dǝp soraysǝn.

4 Buning üqün mǝn sanga wǝ dostliringƣa jawab berǝy.

5 Asmanƣa ⱪarap baⱪⱪin,

sǝndin xunqǝ egiz bolƣan bulutlarƣa nǝzǝr salƣin.

6 Əgǝr sǝn gunaⱨ ⱪilsang, Hudaƣa nemǝ ziyan yǝtküzǝlǝytting?

Asiyliⱪliring kɵp bolsa Uningƣa nemǝ nuⱪsan yetǝtti?

7 Sǝn ⱨǝⱪⱪaniy bolsang, Uningƣa nemǝ payda berǝlǝysǝn?

U sening ⱪolungdin nemigǝ erixǝtti?

8 Yamanliⱪing sanga ohxax bir insanƣila ziyan salidu,

ⱨǝⱪⱪaniyliⱪing adǝm balisiƣila payda yǝtküzidu.

9 Zulumning kɵplikidin adǝmlǝr pǝryad ⱪilidu,

küqlüklǝrning besimidin nalǝ ⱪilip aⱨ uruxidu.

10 Lekin ⱨeqkim: ‹Keqisi nahxilarni yürǝkkǝ salidiƣan,

11 yǝr yüzidiki ⱨaywanlardin kɵprǝk bizgǝ ilim ɵgitidiƣan,

asmandiki ⱪuxlarƣa ⱪariƣanda bizgǝ qongraⱪ ⱨekmǝt beridiƣan,

mening yaratⱪuqim bolƣan Huda ⱪǝyǝrdǝ?› dǝp sorimaydu.

12 Xu sǝwǝbtin yamanlar ularƣa ⱪarxi qongqiliⱪ ⱪilƣanda,

ular pǝryad ⱪilsimu, U jawab bǝrmǝydu.

13 Bǝrⱨǝⱪ, Huda ⱪuruⱪ du’alarni anglimaydu.

Ⱨǝmmigǝ ⱪadir Bolƣuqi bundaⱪ pǝryadlarƣa etibar bǝrmǝydu.

14 Sǝn: ‹Uni kɵrǝlmǝymǝn› desǝngmu,

dǝwaying Uning aldida turidu.

Xunga sǝwr ⱪilip kütkin.

15 Əmma ⱨazir, U tehi ƣǝzǝp bilǝn kǝlmigǝnliki üqünla,

Uning adǝmlǝrning tǝkǝbburluⱪi bilǝn kari bolmaydu dǝysǝn.

16 Xunglaxⱪa Əyyub eƣiz eqip ⱪuruⱪ gǝp ⱪildi,

ⱨeqnemini uⱪmay turup kɵp sɵzlidi».