Eliⱨuning ikkinqi sɵzi
34
1 Eliⱨu yǝnǝ sɵz ⱪilip mundaⱪ dedi: 2 «Əy danalar, sɵzlirimni anglanglar.
Əy danixmǝnlǝr, manga ⱪulaⱪ selinglar.
3 Qünki tanglay ta’amni tetiƣandǝk,
ⱪulaⱪmu sɵzlǝrni sinaydu.
4 Biz ǝmdi ɵzimiz üqün toƣra bolƣinini tallayli,
nemining yahxi ikǝnlikini bilǝyli.
5 Qünki Əyyub: ‹Mǝn ⱨǝⱪⱪaniydurmǝn,
biraⱪ Huda mening ⱨǝⱪⱪimni tartiwaldi.
6 Ⱨǝⱪdar bolsammu, yalƣanqi sanaldim.
Hataliⱪim bolmisimu, yaramƣa dawa yoⱪ› dǝydu.
7 Əyyubⱪa ohxaydiƣan kim bar?
Kim uningdǝk mǝshirini sudǝk iqidu?
8 U yamanliⱪ ⱪilƣuqilarning ⱨǝmraⱨi bolup,
yamanlar bilǝn billǝ mangidu.
9 Qünki u: ‹Kixi Hudadin sɵyünsimu,
uning ⱨeq paydisi bolmaydu› dedi.
10 Xunga, ǝy ǝⱪilliⱪ kixilǝr, manga ⱪulaⱪ selinglar.
Huda Yamanliⱪ ⱪilixtin uzaⱪtur,
natoƣra ix ⱨǝmmigǝ ⱪadir Hudadin yiraⱪtur.
11 Qünki U ⱨǝr adǝmgǝ uning ǝmǝllirigǝ muwapiⱪ yanduridu,
ⱨǝrkimgǝ uning ix-ⱨǝrikitigǝ muwapiⱪ in’am beridu.
12 Ⱨǝⱪiⱪǝtǝn Huda yamanliⱪ ⱪilmaydu,
ⱨǝmmigǝ ⱪadir Huda adalǝtni buzmaydu.
13 Kim Uningƣa yǝr-zeminni tapxurdi?
Kim Uni pütün dunyani baxⱪuruxⱪa tǝyinlidi?
14 Əgǝr U kɵnglidǝ insanƣa ⱪarxi qiⱪip,
Ɵzining Roⱨi wǝ nǝpisini ⱪayturuwalsa,
15 ⱨǝmmǝ tirik jan bir dǝmdila ⱨalak bolatti,
insanlar yǝnǝ tupraⱪⱪa ⱪaytatti.
16 Əmdi sening ǝⱪling bolsa, buni angliƣin,
sɵzlirimning sadasiƣa ⱪulaⱪ salƣin.
17 Adalǝttin nǝprǝtlǝngüqi ⱨɵkümranliⱪ ⱪilalamdu?
Sǝn ⱨǝmmidin adil Bolƣuqini ǝyiblǝmsǝn?
18 Kixi bir padixaⱨⱪa: ‹Əy yarimas›,
esilzadilǝrgǝ: ‹Əy yamanlar› deyǝlǝmdu?
19 Huda bolsa ǝmirlǝrgǝ yan basmaydu,
bayni kǝmbǝƣǝldin üstün kɵrmǝydu,
qünki ularning ⱨǝmmisi Ɵz ⱪollirining ixliridur.
20 Mana, kɵz yumup aqⱪuqǝ adǝmlǝr ɵlüp ketidu,
Yerim keqidǝ hǝlⱪ tǝwrinip ⱨalak bolidu.
Küqlüklǝrmu insan ⱪoli tǝgmǝstin yoⱪ bolup ketidu.
21 Qünki Uning kɵzliri adǝmlǝrning yollirididur,
ularning ⱨǝmmǝ ⱪǝdǝmlirini kɵridu.
22 Yamanliⱪ ⱪilƣuqilarƣa ɵzini yoxurƣili
nǝ ⱪarangƣu jay nǝ ɵlüm sayisi tepilmas.
23 Qünki insanƣa ⱨɵküm ⱪilix üqün,
Hudaning uzunƣiqǝ kɵzitixi lazim ǝmǝs.
24 U küqlüklǝrni tǝkxürmǝyla parqilap,
ularning orniƣa baxⱪilarni ⱪoyidu.
25 Qünki U ularning ⱪilƣanlirini bilidu,
ularni keqidǝ düm kɵmtürüp ⱨalak ⱪilidu.
26 U ularni yamanlarning arisida,
adǝmlǝrning kɵz aldida uridu.
27 Qünki ular uningƣa ǝgixixtin bax tartti,
uning yollirining ⱨeqⱪaysisiƣa etibar bǝrmidi.
28 Ularning ⱪilmixliri sǝwǝbidin
miskinlǝrning pǝryadi Uning aldiƣa kǝldi,
zulum tartⱪanlarning nalisi Uning ⱪuliⱪiƣa yǝtti.
29 Əgǝr U jim tursa, kim Uni ǝyibliyǝlǝydu?
U yüzini yoxuruwalsa, kim Uni kɵrǝlǝydu?
U, mǝyli bir hǝlⱪ bolsun yaki bir adǝm bolsun,
ⱨǝmmisining üstidǝ turidu.
30 U hǝlⱪⱪa tuzaⱪ ⱪurmisun dǝp
munapiⱪlarning ⱨɵkümranliⱪ ⱪilixiƣa yol ⱪoymaydu.
31 Lekin birsi Hudaƣa: ‹Mǝn tǝkǝbburluⱪ ⱪildim,
ǝmdi yǝnǝ gunaⱨ ⱪilmaymǝn.
32 Mening bilmiginimni sǝn Manga ɵgǝtkin.
Mǝn yamanliⱪ ⱪilƣan bolsam, yǝnǝ ⱪilmaymǝn›
degǝn bolsa yahxi bolatti.
33 Əmdi sǝn Uning bekitkinini rǝt ⱪilƣining üqün,
U sening haliƣining boyiqǝ ix tutamdu?
Ⱪarar ⱪilƣuqi sǝn, mǝn ǝmǝs, undaⱪta ɵz bilginingni sɵzlǝ.
34 Lekin ǝⱪilliⱪ kixilǝr,
sɵzlirimni angliƣan dana adǝmlǝr manga dǝyduki:
35 ‹Əyyub ⱨeqnemini bilmǝy gǝp ⱪildi,
u oylimay sɵzlidi›.
36 Kaxki Əyyub ahirƣiqǝ sinalsa idi.
Qünki u yaman adǝmlǝrdǝk jawab bǝrdi.
37 U ɵz gunaⱨiƣa isyannimu ⱪoxup,
arimizda qawak qelip,
Hudaƣa ⱪarxi nurƣun sɵz ⱪildi».