1 Pǝrwǝrdigar Musaƣa sɵz ⱪilip mundaⱪ dedi:

2 «Sǝn Ⱨarun wǝ uning oƣulliriƣa kɵydürmǝ ⱪurbanliⱪ toƣrisida mundaⱪ ⱪa’idǝ bekitkin: ‹Kɵydürmǝ ⱪurbanliⱪ pütün keqǝ tang atⱪuqǝ ⱪurbangaⱨning oqiⱪining üstidǝ kɵyüp tursun wǝ ⱪurbangaⱨning oti ɵqmǝy kɵyüp tursun.

3 Kaⱨin kǝndirdin toⱪulƣan libasni kiyip, kǝndirdin bolƣan iq kiyimini kiyip yalingaq yǝrlirini yepip, ⱪurbangaⱨning üstidiki ot kɵydürüwǝtkǝn kɵydürmǝ ⱪurbanliⱪining külini elip, uni ⱪurbangaⱨning yan tǝripigǝ ⱪoysun. 4 Andin u ɵz kiyimini seliwetip, baxⱪa kiyim kiyip kelip, külni bargaⱨning taxⱪiriƣa elip qiⱪip, pakiz bir jayƣa ⱪoysun.

5 Əmma ⱪurbangaⱨning oti kɵyüp tursun, ⱨeqⱪaqan ɵqürülmisun. Kaⱨin ⱨǝr ǝtigǝndǝ uningƣa otun taxlap kɵydürüp, üstigǝ kɵydürmǝ ⱪurbanliⱪni tizip, amanliⱪ ⱪurbanliⱪining yeƣini üstigǝ ⱪoyup kɵydürsun. 6 Ⱪurbangaⱨning oti ⱨǝmixǝ kɵyüp tursun, ⱨeqⱪaqan ɵqürülmisun›.

7 ‹Axliⱪ ⱨǝdiyǝsi toƣrisidiki ⱪanun xuki, Ⱨarunning oƣulliri uni ⱪurbangaⱨning aldiƣa, Pǝrwǝrdigarning aldiƣa kǝltürsun.

8 Kaⱨin axliⱪ ⱨǝdiyǝsi bolƣan esil undin bir qanggal elip, yeƣi wǝ üstidiki ⱨǝmmǝ mǝstikini ⱪoxup, bu uning yadlinix ⱨǝssisi bolsun dǝp, Pǝrwǝrdigarning aldiƣa hux puraⱪ kǝltürüx üqün ⱪurbangaⱨta kɵydürsun. 9 Ⱨarun wǝ oƣulliri axliⱪ ⱨǝdiyǝsining exip ⱪalƣan ⱪismini yesun. U hemirturuq selinmay pixurulup, muⱪǝddǝs yǝrdǝ yeyilsun. Ular uni uqrixix qedirining ⱨoylisida yesun. 10 U boldurulƣan hemirdin pixurulmisun. Mǝn buni Manga atalƣan otta kɵydürülidiƣan ⱨǝdiyǝ-ⱪurbanliⱪlarning iqidin ularning ⱨǝssisi ⱪilip bǝrdim. Bu gunaⱨ ⱪurbanliⱪi wǝ ǝyib ⱪurbanliⱪiƣa ohxax ǝng muⱪǝddǝs bolidu. 11 Ⱨarunning ǝwladidin bolƣan ǝr kixining ⱨǝmmisi buningdin yesun. Nǝslinglardin nǝslinglarƣa, bu ⱨǝmixǝ Pǝrwǝrdigarƣa atalƣan otta kɵydürülidiƣan ⱨǝdiyǝ-ⱪurbanliⱪlardin ularning ⱨǝⱪⱪi bolidu. Uningƣa ⱪol tǝgküzgǝn ⱨǝrbir kixi muⱪǝddǝs bolidu›».

12 Pǝrwǝrdigar Musaƣa sɵz ⱪilip mundaⱪ dedi:

13 «Ⱨarun yaki oƣullirining biri mǝsiⱨlǝngǝn küni, u Pǝrwǝrdigarning aldiƣa esil undin bir efaning ondin birini axliⱪ ⱨǝdiyǝsi süpitidǝ, ⱨǝmixǝ yerimini ǝtigǝndǝ, yǝnǝ bir yerimini ahxamda sunsun. 14 U tawida yaƣ bilǝn etilip pixurulƣandin keyin, sǝn uni elip kirgin. Bu axliⱪ ⱨǝdiyǝsining parqilirini Pǝrwǝrdigarning aldiƣa hux puraⱪ kǝltürsun dǝp sunƣin. 15 Uning oƣullirining ⱪaysisi uning ornida turux üqün mǝsiⱨlǝnsǝ, u ɵzimu xundaⱪ ⱪilsun. Bu mǝnggülük ⱪanun bolidu. Pǝrwǝrdigar üqün bu ⱪurbanliⱪ toluⱪ kɵydürülsun. 16 Qünki kaⱨinning axliⱪ ⱨǝdiyǝsi ⱨǝmixǝ pütünlǝy kɵydürülüp, ⱨǝrgiz yeyilmisun».

17 Pǝrwǝrdigar Musaƣa sɵz ⱪilip mundaⱪ dedi:

18 «Sǝn Ⱨarun wǝ uning oƣulliriƣa gunaⱨ ⱪurbanliⱪi toƣrisida mundaⱪ degin: ‹Kɵydürmǝ ⱪurbanliⱪi bolƣan ⱨaywan boƣuzlinidiƣan jayda, gunaⱨ ⱪurbanliⱪi bolidiƣan ⱨaywanmu Pǝrwǝrdigarning aldida boƣuzlansun. Bu ⱪurbanliⱪ ǝng muⱪǝddǝs bolidu. 19 Uni gunaⱨ ⱪurbanliⱪi süpitidǝ sunƣan kaⱨin uni yesun. Bu ⱪurbanliⱪ uqrixix qedirining ⱨoylisida, muⱪǝddǝs yǝrdǝ yeyilsun. 20 Uningƣa ⱪol tǝgküzgǝn ⱨǝrbir kixi muⱪǝddǝslikkǝ uqraydu. Xuningdǝk, ǝgǝr ⱪandin azƣinǝ bir kixining kiyimigǝ qaqrap ⱪalsa, ⱪan qaqriƣan jay muⱪǝddǝs yǝrdǝ yuyulsun. ^◼   21 Bu ⱪurbanliⱪ bir sapal ⱪazanda pixurulƣan bolsa, ⱪazan sundurulsun, lekin mis ⱪazanda pixurulƣan bolsa, u sürülüp, su bilǝn yuyulsun. 22 Kaⱨinlardin bolƣan ǝr kixilǝrning ⱨǝmmisi buningdin yesun. Bu ǝng muⱪǝddǝs bolidu. 23 Lekin muⱪǝddǝs jayda kǝfarǝt kǝltürüx üqün, uqrixix qediriƣa ⱪeni kǝltürülgǝn gunaⱨ ⱪurbanliⱪi bolsa ⱨǝrgiz yeyilmǝy, bǝlki otta kɵydürülsun›.