1 Andin keyin Bǝni Isra’ilning pütün jama’iti Elimdin ayrilip yolƣa qiⱪti. Ular Misir zeminidin qiⱪip bir yerim aydin keyin, Elim bilǝn Sinayning arisidiki Sin qɵligǝ yetip kǝldi. 2 Əmma Bǝni Isra’ilning pütün jama’iti qɵldǝ Musa wǝ Ⱨarundin aƣrinip ƣotuldixip, 3 ularƣa: «Kaxki Pǝrwǝrdigarning ⱪoli bizni Misir zeminida ɵltürgǝn bolsa idi. U yǝrdǝ biz gɵx ⱪazanlirining yenida olturup, toyƣudǝk nan yemiduⱪmu? Lekin silǝr bu jama’ǝtning ⱨǝmmisini aqliⱪtin ɵltürüx üqün bu qɵlgǝ elip kǝldinglar!» dedi. 4 Xuning bilǝn Pǝrwǝrdigar Musaƣa: «Mana, Mǝn asmandin silǝrgǝ nan yaƣdurimǝn. Hǝlⱪ ⱨǝr küni qiⱪip, bir künlük lazimliⱪini yiƣiwalsun. Bu tǝriⱪidǝ Mǝn ularning Mening ⱪanunum boyiqǝ mengixni halamdu-halimamdu dǝp sinap kɵrimǝn. 5 Altinqi küni bolsa ularning yiƣⱪan nǝrsiliri baxⱪa künningkidin ikki ⱨǝssǝ kɵp bolidu» dedi.

6 Musa wǝ Ⱨarun ⱨǝmmǝ Bǝni Isra’ilƣa: «Silǝr bu ahxam ɵzünglarni Misir zeminidin elip qiⱪⱪuqining Pǝrwǝrdigar ikǝnlikini bilisilǝr wǝ 7 ǝtǝ Pǝrwǝrdigarning uluƣluⱪini kɵrisilǝr. Mana, Pǝrwǝrdigar silǝrning uningdin rǝnjigininglarni anglidi. Qünki silǝr bizdin aƣrinip ƣotuldiƣudǝk biz kimtuⱪ?» dedi. 8 Musa yǝnǝ sɵz ⱪilip: «Bu ahxam Pǝrwǝrdigar silǝrgǝ yegili gɵx beridu, ǝtigǝndǝ toyƣudǝk nan beridu, qünki Pǝrwǝrdigar silǝr Uningdin rǝnjip ƣotuldaxⱪininglarni anglidi. Biz nemituⱪ? Əmǝliyǝttǝ silǝr bizdin ǝmǝs, Pǝrwǝrdigardin rǝnjidinglar» dedi. 9 Andin keyin Musa Ⱨarunƣa: «Bǝni Isra’ilning pütün jama’itigǝ: ‹Pǝrwǝrdigarning aldiƣa kelinglar, qünki U silǝrning rǝnjip ƣotuldaxⱪininglarni anglidi› dǝp eytⱪin» dedi. 10 Ⱨarun Bǝni Isra’ilning pütün jama’itigǝ sɵzlǝp turƣinida ular qɵl tǝrǝpkǝ ⱪarisa, mana, Pǝrwǝrdigarning xan-xǝripi bulutta kɵründi.

11 Pǝrwǝrdigar Musaƣa mundaⱪ dedi:

12 «Mǝn Bǝni Isra’ilning rǝnjip ƣotuldaxⱪinini anglidim. Əmdi ularƣa: ‹Huda: «Bu ahxam silǝr gɵx yǝysilǝr, ǝtigǝndǝ nanƣa toyisilǝr. Buning bilǝn Mening Hudayinglar Pǝrwǝrdigar ikǝnlikimni tonup yetisilǝr» dedi› dǝp eytⱪin».

13 Ahxam bolƣanda bɵdünilǝr kelip bargaⱨni ⱪaplap kǝtti wǝ ǝtigǝndǝ bargaⱨning qɵrisidǝ xǝbnǝm qüxüp ⱪalƣanidi. 14 Lekin xǝbnǝm kɵtürülüp kǝtkǝndǝ, mana, qɵllükning yüzidǝ bir ⱪǝwǝt ⱪirowdǝk nepiz kiqik yapraⱪsiman nǝrsilǝr kɵründi. 15 Bǝni Isra’il uni kɵrgǝndǝ uning nemǝ ikǝnlikini bilǝlmǝy: «Bu nemidu?» deyixti. Musa ularƣa: «Pǝrwǝrdigar silǝrgǝ yeyix üqün bǝrgǝn yemǝkliktur. 16 Pǝrwǝrdigar: ‹Ⱨǝrbiringlar eⱨtiyajinglarƣa ⱪarap muwapiⱪ miⱪdarda uningdin yiƣiwelinglar. A’ilidikilǝrning saniƣa ⱪarap ⱨǝrbir kixi üqün bir omǝr miⱪdarda ⱨesablap yiƣinglar. Ⱨǝr adǝm ɵz qediridiki kixilǝr üqün yiƣiwalsun› dǝp buyruƣan» dedi. ^◼   17 Bǝni Isra’il xundaⱪ ⱪilip, bǝzisi jiⱪraⱪ bǝzisi azraⱪ yiƣiwaldi. 18 Lekin ular uni omǝr ɵlqimi bilǝn tartⱪanda, jiⱪraⱪ yiƣⱪan kixining oxuⱪ qiⱪmidi, azraⱪ yiƣⱪan kixiningmu kǝm qiⱪmidi. Ⱨǝrbir kixi ɵz yǝydiƣiniƣa yǝtküdǝk yiƣⱪanidi. 19 Musa ularƣa: «Silǝrdin ⱨeqkim buningdin ⱨeq nemini ǝtigǝ ⱪaldurmisun» dedi. 20 Xundaⱪ bolsimu, ular Musaning sɵzini tingximay, bǝlki bǝzisi uningdin bir ⱪismini ǝtisigǝ saⱪlap ⱪoydi. Əmma saⱪlap ⱪoyulƣanliri ⱪurtlap sesip kǝtti. Bu ix üqün Musa ularƣa hapa bolup aqqiⱪlandi.

21 Bu sǝwǝbtin ularning ⱨǝrbiri ⱨǝr ǝtigǝn ɵz yǝydiƣiniƣa ⱪarap yiƣiwalatti. Qünki exip ⱪalƣini aptap qiⱪⱪanda erip ketǝtti.

22 Lekin altinqi küni ular künlük ozuⱪning ikki ⱨǝssisini toplap, ⱨǝrbir kixi üqün ikki omǝr yiƣiwaldi. Jama’ǝtning ⱨǝmmǝ baxliⱪliri kelip buni Musaƣa eytti. 23 U ularƣa: «Pǝrwǝrdigar: ‹Ətǝ aram küni, Pǝrwǝrdigarƣa atalƣan muⱪǝddǝs xabat küni bolƣaqⱪa, bügün pixuridiƣininglarni pixurup, ⱪaynitidiƣininglarni ⱪaynitiwelip, exip ⱪalƣinini ǝtigiqǝ saⱪlap ⱪoyunglar› dǝp buyruƣan» dedi. ^◼   24 Ular Musa buyruƣandǝk, uni ǝtisigǝ saⱪlap ⱪoyƣanda, u sesimay, ⱪurtlimay, saⱪ turdi. 25 Musa: «Bügün buni yǝnglar, qünki bügün Pǝrwǝrdigarning xabat küni bolƣini üqün bügün yǝrdin ⱨeqnemǝ tapalmaysilǝr. 26 Altǝ kün buningdin yiƣinglar, biraⱪ yǝttinqi küni xabat bolƣini üqün u kündǝ ⱨeqnemǝ tepilmaydu» dedi. 27 Hǝlⱪtin birnǝqqisi yǝnila yǝttinqi küni ozuⱪ yiƣⱪili qiⱪti, lekin ⱨeqnemǝ tapalmidi. 28 Bu qaƣda Pǝrwǝrdigar Musaƣa: «Silǝr ⱪaqanƣiqǝ Mening ǝmrlirim wǝ ⱪanun-bǝlgilimilirimgǝ ǝmǝl ⱪilixni rǝt ⱪilisilǝr? 29 Mana, Pǝrwǝrdigar silǝrgǝ xabat künini bǝrgini üqün, ⱨǝrbiringlar ɵz jayinglarda olturunglar, yǝttinqi küni ⱨeqkim ɵz ɵyidin taxⱪiriƣa qiⱪmisun dǝp, ikki künlük ozuⱪni altinqi küni bǝrdi ǝmǝsmu?» dedi. 30 Xuning üqün hǝlⱪ yǝttinqi küni aram aldi.

31 Bǝni Isra’il bu yemǝklikning namini «manna» ⱪoyup ⱪoydi. U axkɵki uruⱪidǝk aⱪ bolup, uning tǝmi ⱨǝsǝl ⱪoxulƣan ⱪuymaⱪⱪa ohxaytti. 32 Musa: «Pǝrwǝrdigarning ǝmri xuki: ‹Kǝlgüsi ǝwladliringlarƣa, Mǝn silǝrni Misirdin elip qiⱪⱪanda silǝrgǝ qɵldǝ yeyixkǝ bǝrgǝn nanni kɵrsitix üqün, uningdin bir omǝr toxⱪuzup saⱪlap ⱪoyunglar› » dedi. 33 Musa Ⱨarunƣa: «Ⱪaqini elip, uningƣa bir omǝr miⱪdari manna selip, kǝlgüsi ǝwladlar üqün saⱪlansun dǝp, Pǝrwǝrdigarning ⱨuzuriƣa ⱪoyup ⱪoyƣin» dedi. 34 Ⱨarun Pǝrwǝrdigar Musaƣa buyruƣandǝk, saⱪlax üqün ⱪaqini xaⱨadǝt sanduⱪining aldiƣa ⱪoyup ⱪoydi. 35 Bu tǝriⱪidǝ Bǝni Isra’il olturaⱪlaxⱪan bir zeminƣa yetip kǝlgüqǝ, ⱪiriⱪ yil manna yedi. Ular Kǝn’an zeminining qegrisiƣa yǝtküqǝ manna yedi. 36 Bir omǝr bolsa efaning ondin birigǝ barawǝr idi. ^◼