Yaⱪub oƣulliriƣa hǝyrlik du’a oⱪuydu
49
1 Andin keyin Yaⱪub oƣullirini qaⱪirip mundaⱪ dedi: «Ⱨǝmminglar jǝm bolunglar. Mǝn silǝrgǝ keyinki künlǝrdǝ bolidiƣan wǝⱪǝlǝrni eytip berǝy. 2 Əy Yaⱪubning oƣulliri, yiƣilip birliktǝ anglanglar,
atanglar Isra’ilƣa ⱪulaⱪ selinglar.
3 Əy Rubǝn, sǝn mening tunji oƣlumsǝn,
küq-ⱪuwwitimning tunji mewisi bolƣaq, abruy wǝ ⱪudrǝttǝ üstünsǝn.
4 Əmma kǝlkündǝk tizginsiz bolƣining üqün, ǝmdi üstün bolalmaysǝn.
Qünki sǝn atangning kɵrpisigǝ qiⱪip, uni bulƣiding!
U mening kɵrpǝmgǝ qiⱪti!
5 Ximon bilǝn Lawiy, bu ikki ⱪerindaxning piqaⱪliri
zulumning ⱪoralliridur.
6 Əy jenim, ularning mǝsliⱨǝtigǝ kirmigin!
Əy izzitim, ularning mǝjlisigǝ ⱪoxulmiƣin!
Qünki ular aqqiⱪida adǝmlǝrni ɵltürüp,
ɵzliri haliƣanqǝ buⱪilarning pǝyini kǝsti.
7 Ularning yaman aqqiⱪi wǝ ⱪattiⱪ ƣǝzipigǝ lǝnǝt yaƣsun.
Mǝn ularni Yaⱪubning iqidǝ tarⱪitiwetǝrmǝn,
Isra’ilning iqidǝ qeqiwetǝrmǝn.
8 Əy Yǝⱨuda, ⱪerindaxliring seni mahtar.
Ⱪolung düxmǝnliringning gǝjgisidǝ bolar.
Atangning oƣulliri sanga tǝzim ⱪilar.
9 Yǝⱨuda bir yax xirdur.
Əy oƣlum, sǝn owdin ⱪaytip yuⱪiriƣa qiⱪting.
U xirdǝk, yaki bir qixi xirdǝk sozulup yetiwalsa,
kim uni ⱪozƣaxⱪa jur’ǝt ⱪilar?
10 Ⱨɵkümranliⱪ ⱪilix ⱨoⱪuⱪining igisi kǝlmigüqǝ,
Yǝⱨudadin ⱨakimiyǝt tayiⱪi ketip ⱪalmas
wǝ uning nǝslidin sǝltǝnǝt ⱨasisi yoⱪalmas.
Hǝlⱪlǝr uningƣa ita’ǝt ⱪilar. ◼
11 U mada exǝkni üzüm teliƣa,
mada exǝkning tǝhiyini sǝrhil üzüm teliƣa baƣlap ⱪoyar.
U libasini xarabta, tonini üzüm ⱪenida yuyar.
12 Uning kɵzliri xarabtin ⱪizirip ketǝr,
qixliri sütning sǝwǝbidin ap’aⱪ turar.
13 Zǝbulun dengiz boyida turar.
Makani kemilǝrning porti bolar.
Qegrisi Sidonƣiqǝ yetip barar.
14 Issakar küqlük bir exǝktur.
U ikki ⱪotan arisida yatar.
15 U aramgaⱨning yahxi ikǝnlikigǝ ⱪarap,
zeminning obdanliⱪini kɵrginidǝ,
yük kɵtürüx üqün mürisini egip,
ⱪul bolup ⱨaxarƣa tutular.
16 Dan Isra’ilning ⱪǝbililirining biri bolup,
ɵz hǝlⱪigǝ ⱨɵküm qiⱪirar.
17 Dan yol üstidiki yilandur.
U qiƣir yol üstidǝ turup, atning paqiⱪini qeⱪip,
mingüqini arⱪisiƣa mollaⱪ atⱪuzidiƣan zǝⱨǝrlik yilandur.
18 Əy Pǝrwǝrdigar, mǝn ⱪutⱪuzuxungni tǝlmürüp kütimǝn.
19 Gadⱪa ⱪaraⱪqilar ⱨujum ⱪilar,
lekin u ularning arⱪisidin ⱪoƣlap tapinini basar.
20 Axǝrning neni yaƣliⱪ bolar.
U padixaⱨlarni lǝzzǝtlik tamaⱪlar bilǝn tǝminlǝr.
21 Naftali ǝrkin ⱪoyuwetilƣan keyiktur.
U qirayliⱪ gǝp ⱪilar.
22 Yüsüp mewilik dǝrǝhtur.
U bulaⱪning boyidiki mewilik dǝrǝhtur.
Uning xahliri tamdin ⱨalⱪip ɵtǝr.
23 Oⱪya atⱪuqilar uni rǝnjitip,
uningƣa oⱪ etip bi’aram ⱪilsimu,
24 uning yayi mustǝⱨkǝm turar.
Uning ⱪolliri Isra’ilning Ⱪoram Texi ⱨǝm Padiqi,
Yaⱪubning ⱨǝmmigǝ ⱪadir Hudasining ⱪoli bilǝn küqlük ⱪilinar.
25 Sanga mǝdǝt berip turƣuqi atangning Hudasining yardimi bilǝn,
sanga yuⱪiridin asmanning bǝrikǝtlirini,
tɵwǝndǝ qongⱪurning bǝrikǝtlirini,
xundaⱪla ǝmqǝk wǝ ⱪorsaⱪning bǝrikitini
ata ⱪilƣuqi ⱨǝmmigǝ ⱪadir Hudaning yardimi bilǝn
sǝn ⱪuwwǝtlinisǝn.
26 Atangning bǝrikiti bolsa ata-bowilirimning bǝrikitidin ziyadǝ bolup,
mǝnggülük ⱪiya-dɵnglüklǝrning qetigiqǝ taⱪixar.
Bu bǝrikǝt Yüsüpning bexiƣa kelǝr,
ɵz ⱪerindaxliridin ayrim turƣuqining qoⱪⱪisiƣa tegǝr.
27 Bǝnyamin yirtⱪuq bɵridur.
Ətigǝndǝ u ow owlap tutⱪinini yǝr.
Ahxamda u oljini bɵlǝr».
28 Mana, bularning ⱨǝmmisi Isra’ilning on ikki ⱪǝbilisidur. Mǝzkur sɵzlǝr bolsa atisining ularƣa hǝyrlik du’a ⱪilƣanda eytⱪan sɵzliridur. U ularning ⱨǝrbirigǝ has bolƣan bir bǝrikǝt bilǝn ularƣa hǝyrlik du’a ⱪildi. 29 Andin keyin u ularƣa mundaⱪ dǝp buyrudi: «Mǝn ǝjdadlirimning ⱪexiƣa ketix aldidimǝn. Silǝr meni ata-bowilirimning yenida, Hittiylardin bolƣan Əfronning etizliⱪidiki ƣarƣa dǝpnǝ ⱪilinglar. 30 U ƣar, Kǝn’an zeminida Mamrǝning udulidiki Makpelaning etizliⱪiƣa jaylaxⱪan. Ibraⱨim xu ƣarni etizliⱪ bilǝn ⱪoxup, uni yǝrlik ⱪilay dǝp, Hittiylardin bolƣan Əfrondin setiwalƣanidi. 31 Xu yǝrdǝ Ibraⱨim wǝ ayali Saraⱨ dǝpnǝ ⱪilindi, xu yǝrdǝ ⱨǝm Is’ⱨaⱪ wǝ ayali Ribǝⱪamu dǝpnǝ ⱪilindi. Yǝnǝ xu yǝrdǝ, mǝn Leyanimu dǝpnǝ ⱪildim. 32 Bu etizliⱪ, iqidiki ƣar bilǝn birgǝ Hitning ǝwladidin setiwelinƣanidi».
33 Yaⱪub oƣulliriƣa bu wǝsiyǝtni tamam ⱪilip bolƣanda, ornida putlirini yiƣip, ahirⱪi nǝpisini berip, ǝjdadlirining ⱪexiƣa kǝtti.