1 Isra’il ⱨǝmmǝ mal-mülkini elip yolƣa qiⱪti. U Bǝ’ǝrxebaƣa kelip, u yǝrdǝ atisi Is’ⱨaⱪning Hudasiƣa atap ⱪurbanliⱪlarni sundi. 2 Keqisi Huda bir wǝⱨiydǝ Isra’ilƣa: «Əy Yaⱪub, ǝy Yaⱪub» dedi. U: «Mana mǝn» dǝp jawap bǝrdi. 3 U uningƣa: «Mǝn Huda, sening atangning Hudasidurmǝn. Sǝn Misirƣa berixtin ⱪorⱪmiƣin, qünki Mǝn seni u yǝrdǝ qong bir hǝlⱪ ⱪilimǝn. 4 Mǝn sǝn bilǝn billǝ Misirƣa berip, yǝnǝ xu yǝrdin seni ⱪayturup kelimǝn. Yüsüp ɵz ⱪoli bilǝn sening kɵzüngni yumduridu» dedi.

5 Andin Yaⱪub Bǝ’ǝrxebadin ⱪozƣilip yolƣa qiⱪti. Isra’ilning oƣulliri ɵz atisi Yaⱪub wǝ bala-qaⱪilirini, Fir’ǝwn ularni elip kelix üqün ǝwǝtkǝn ⱨarwilarƣa olturƣuzup, 6 qarwa malliri wǝ Kǝn’an zeminida tapⱪan mal-mülkini elip mangdi. Bu tǝriⱪidǝ Yaⱪub ⱨǝmmǝ ǝwladliri bilǝn billǝ Misirƣa kǝldi. 7 U oƣulliri wǝ oƣul nǝwrilirini, ⱪizliri wǝ ⱪiz nǝwrilirini yiƣip, ⱨǝmmǝ ǝwladlirini ɵzi bilǝn billǝ Misirƣa elip kǝldi.

8 Misirƣa kǝlgǝn Isra’ilning ǝwladlirining isimliri tɵwǝndikiqǝ:

Yaⱪub wǝ uning oƣulliri: Yaⱪubning tunji oƣli Rubǝn idi.

9 Rubǝnning oƣulliri Hanok, Pallu, Hǝzron wǝ Karmi idi.

10 Ximonning oƣulliri Yemu’ǝl, Yamin, Oⱨad, Yakin, Zohar wǝ Kǝn’anliⱪ ayaldin bolƣan Xa’ul idi.

11 Lawiyning oƣulliri Gǝrxon, Ⱪoⱨat wǝ Mǝrari idi.

12 Yǝⱨudaning oƣulliri Er, Onan, Xela, Pǝrǝz wǝ Zeraⱨ idi. Əmma Er wǝ Onan Kǝn’an zeminida ɵlüp kǝtkǝnidi. Pǝrǝsning oƣulliri bolsa Hǝzron wǝ Hamul idi.

13 Issakarning oƣulliri Tolaⱨ, Puwa, Yobab wǝ Ximron idi.

14 Zǝbulunning oƣulliri Serǝd, Elon wǝ Yaⱨli’ǝl idi.

15 Bular Leyaning Yaⱪubⱪa Paddan-Arramda tuƣup bǝrgǝn oƣulliri idi. Uningdin bolƣan oƣul-ⱪiz ǝwladliri, ⱪizi Dina bilǝn jǝm’iy ottuz üq jan idi.

16 Gadning oƣulliri Zifyon, Haggi, Xuniy, Əzbon, Eri, Arodi wǝ Ar’eli idi.

17 Axǝrning oƣulliri Yimna, Yixwa, Yixwi wǝ Bǝriya idi wǝ ularning singlisi Serah idi. Bǝriyaning oƣulliri bolsa Hebǝr wǝ Malki’ǝl idi.

18 Bular Laban ⱪizi Leyaƣa dedǝk ⱪilip bǝrgǝn Zilpaning Yaⱪubⱪa tuƣup bǝrgǝn oƣulliri idi. Uningdin bolƣan ǝwladliri jǝm’iy on altǝ jan idi.

19 Yaⱪubning ayali Raⱨilǝning oƣulliri Yüsüp wǝ Bǝnyamin idi.

20 Misir zeminida Yüsüpning ɵzigǝ tuƣulƣan oƣulliri Manassǝ wǝ Əfra’im idi. Bularni On xǝⱨirining kaⱨini Potiferaning ⱪizi Asinat uningƣa tuƣup bǝrdi.

21 Bǝnyaminning oƣulliri Bela, Bekǝr, Axbǝl, Gera, Na’aman, Ehi, Rox, Muppim, Huppim wǝ Ard idi.

22 Bular Raⱨilǝning Yaⱪubⱪa tuƣup bǝrgǝn oƣulliri idi. Uningdin bolƣan ǝwladliri jǝm’iy on tɵt jan idi.

23 Danning oƣli Huxim idi.

24 Naftalining oƣulliri Yahsi’ǝl, Guni, Yesǝr wǝ Xillǝm idi.

25 Bular Laban ɵz ⱪizi Raⱨilǝgǝ dedǝk ⱪilip bǝrgǝn Bilⱨaning Yaⱪubⱪa tuƣup bǝrgǝn oƣulliri idi. Uningdin bolƣan ǝwladliri jǝm’iy yǝttǝ jan idi.

26 Yaⱪubning puxtidin bolup, uning bilǝn billǝ Misirƣa kǝlgǝnlǝr, Yaⱪubning kelinliridin baxⱪa, jǝm’iy atmix altǝ jan idi. 27 Yüsüpning Misirda tuƣulƣan oƣulliri ikki idi. Yaⱪub jǝmǝtidin bolup Misirƣa kǝlgǝnlǝr jǝm’iy yǝtmix jan idi.

28 Yaⱪub, Yüsüp uni Goxǝngǝ baxlap barsun dǝp, Yǝⱨudani Yüsüpning yeniƣa ǝwǝtti. Xundaⱪ ⱪilip ular Goxǝn wilayitigǝ kelip qüxti. 29 Yüsüp ɵz ⱨarwisini tǝyyarlap, atisi Isra’ilning aldiƣa Goxǝngǝ qiⱪti. U uning yeniƣa yetip kǝlgǝndǝ, uning boyniƣa girǝ selip ⱪuqaⱪlap, uzunƣiqǝ yiƣlidi. 30 Isra’il Yüsüpkǝ: «Mǝn yüzüngni kɵrüp ⱨayat ikǝnlikingni bildim! Əmdi ɵlüp ketixkǝ razimǝn» dedi. 31 Andin keyin Yüsüp ɵz ⱪerindaxliri wǝ atisining ɵyidikilǝrgǝ mundaⱪ dedi: «Mǝn ⱨazir berip Fir’ǝwngǝ hǝwǝr berip: ‹Kǝn’an zeminidiki ⱪerindaxlirim wǝ atamning ɵyidikilǝr ⱪeximƣa kǝldi. 32 Bu kixilǝr padiqi bolup, mal beⱪip kǝlgǝqkǝ, ⱪoy-kaliliri wǝ ⱨǝmmǝ mal-mülüklirini elip kǝldi› dǝp eytay. 33 Əmdi Fir’ǝwn silǝrni qaⱪirip silǝrdin: ‹Nemǝ ix-oⱪǝt ⱪilisilǝr?› dǝp sorisa, 34 silǝr uningƣa: ‹Biz, ⱪulliring, kiqiklikimizdin tartip ata-bowilirimizƣa ohxax pada beⱪip kǝlgǝnmiz› dǝnglar. Xundaⱪ desǝnglar, silǝrning Goxǝn zeminida turup ⱪelixinglarƣa ruhsǝt berilidu. Qünki Misirliⱪlar padiqilarning ⱨǝmmisidin yirginidu».