1 Andin keyin u ƣojidariƣa buyruⱪ berip: «Bu kixilǝrning taƣarliriƣa kɵtürǝlixiqǝ axliⱪ ⱪaqilap, ⱨǝr adǝmning pulini taƣirining aƣziƣa selip ⱪoyƣin. 2 mening ⱪǝdǝⱨim bolƣan kümüx ⱪǝdǝⱨni axliⱪning puli bilǝn billǝ kiqikining taƣirining aƣziƣa tiⱪip ⱪoyƣin» dedi. Ƣojidar Yüsüpning deginidǝk ⱪildi. 3 Ətisi tang yoruƣanda bu adǝmlǝr exǝkliri bilǝn billǝ yolƣa selindi. 4 Lekin ular xǝⱨǝrdin qiⱪip, azƣinǝ mangƣanda, Yüsüp ƣojidariƣa: «Sǝn ⱪozƣilip bu adǝmlǝrning kǝynidin ⱪoƣlap barƣin. Sǝn yetixip barƣiningda ularƣa: ‹Nemixⱪa yahxiliⱪⱪa yamanliⱪ ⱪildinglar? 5 Mana bu hojam xarab iqidiƣan, ⱨǝm pal baⱪidiƣan ⱪǝdǝⱨ ǝmǝsmu? Mundaⱪ ⱪilix arⱪiliⱪ yaman ix ⱪildinglar› degin» dedi.

6 Bu kixi ularning kǝynidin yetip berip, ularƣa bu sɵzni ⱪilƣinida, 7 ular uningƣa: «Hojimiz nemixⱪa mundaⱪ gǝp ⱪilidu? Ⱪulliring undaⱪ ixni ⱨǝrgiz ⱪilmaydu. 8 Mana, biz taƣarlirimizning aƣzidin tapⱪan pulnimu Kǝn’an zeminidin sanga ⱪayturux üqün elip kǝlduⱪ. Xundaⱪ turuⱪluⱪ, hojangning ɵyidin altun-kümüxni oƣrilamduⱪ? 9 Ⱪulliringning iqidin kimdin u nǝrsǝ tepilsa, u ɵltürülsun, bizmu hojimizƣa ⱪul bolayli» dedi. 10 U kixi jawab berip: «Eytⱪininglardǝk bolsun. Ⱪǝdǝⱨ kimning ⱪexidin qiⱪip ⱪalsa, u kixi mening ⱪulum bolidu, ⱪalƣanliringlar bigunaⱨ ⱨesablinisilǝr» dedi. 11 Xuning bilǝn, ular aldirap ⱨǝrbiri ɵz taƣirini yǝrgǝ qüxürüp eqip bǝrdi. 12 U qonginingkidin baxlap kiqikiningkigiqǝ ahtursa, ⱪǝdǝⱨ Bǝnyaminning taƣiridin qiⱪip ⱪaldi.

13 Xuning bilǝn ular ɵz kiyimlirini yirtixip, ⱨǝrbiri exikigǝ yükni artip, xǝⱨǝrgǝ ⱪaytti. 14 Yǝⱨuda wǝ ⱪerindaxliri Yüsüpning ɵyigǝ kǝlsǝ, u tehi u yǝrdǝ idi. Ular uning aldiƣa kelip ɵzlirini yǝrgǝ atti. 15 Yüsüp ularƣa: «Silǝrning bu nemǝ ⱪilƣininglar? Meningdǝk bir kixining pal aqalaydiƣanliⱪini bilmidinglarmu?» dedi. 16 Yǝⱨuda jawab berip: «Əmdi biz hojimizƣa nemǝ dǝyli? Nemǝ dǝp gǝp ⱪilayli? Ɵzimizni ⱪandaⱪ ⱪilip aⱪlayli? Huda ⱪulliringning gunaⱨini axkara ⱪildi. Mana, ǝmdi ⱨǝm biz ⱨǝm ⱪolidin ⱪǝdǝⱨ tepilƣan kixi, ⱨǝmmimiz hojimizƣa ⱪul bolayli» dedi. 17 Lekin u ularƣa: «Yaⱪ, ⱨǝrgiz undaⱪ ⱪilmaymǝn, bǝlki ⱪǝdǝⱨ kimning ⱪolida tepilƣan bolsa, pǝⱪǝt xu kixi manga ⱪul bolsun. Ⱪalƣanliringlar aman-esǝn atanglarning yeniƣa ⱪaytip ketinglar» dedi.

18 Bu qaƣda Yǝⱨuda uningƣa yeⱪin berip mundaⱪ dedi: «Əy hojam, ⱪulungƣa hojamning ⱪuliⱪiƣa bir eƣiz gǝp ⱪilixiƣa ijazǝt bǝrgǝysǝn. Ⱪulungƣa ƣǝzǝplǝnmigǝysǝn, qünki sǝn Fir’ǝwngǝ ohxaxsǝn. 19 Mana, hojam ɵz ⱪulliridin: ‹Atanglar yaki ukanglar barmu?› dǝp soriƣinida, 20 biz hojimizƣa jawab berip: ‹Bizning bir ⱪeri atimiz bar. Uning ⱪeriliⱪida tapⱪan bir kiqik balisimu bar. Bu balining bir anidin bolƣan akisi ɵlüp ketip, u ɵzi yalƣuz ⱪalƣaqⱪa, atisi uni intayin yahxi kɵridu› degǝnimizdǝ, 21 sǝn ⱪulliringƣa: ‹Uni bu yǝrgǝ elip kelinglar. Mǝn uni ɵz kɵzüm bilǝn kɵrǝy› deding. 22 Biz hojimizƣa jawab berip: ‹Bu bala atisidin ayrilalmaydu. Əgǝr atisidin ayrilsa, atisi ɵlüp ketidu› deginimizdǝ, 23 sǝn ɵz ⱪulliringƣa: ‹Əgǝr kiqik ukanglar silǝr bilǝn billǝ kǝlmisǝ, yüzümni ⱨǝrgiz ⱪayta kɵrmǝysilǝr› degǝniding. 24 Biz ⱪulung atimizning ⱪexiƣa barƣanda, hojamning sɵzlirini uningƣa eytip bǝrduⱪ. 25 Atimiz bolsa: ‹Yǝnǝ berip, bizgǝ azraⱪ axliⱪ elip kelinglar› degǝndǝ, 26 biz jawab berip: ‹Biz baralmaymiz. Pǝⱪǝt kiqik ukimiz biz bilǝn billǝ barsa, baralaymiz. Qünki kiqik ukimiz biz bilǝn billǝ bolmisa, u kixining yüzini kɵrǝlmǝymiz› deduⱪ. 27 Sening ⱪulung atimiz bizgǝ: ‹Silǝr bilisilǝrki, ayalim manga ikki oƣul tuƣup bǝrgǝnidi. 28 Biri yenimdin qiⱪip, yoⱪ bolup kǝtti. Mǝn bolsam, u jǝzmǝn titma-titma ⱪiliniptu, dǝp oylidim, xundin keyin uni kɵrüp baⱪmidim. 29 Əmdi silǝr bunimu mening ⱪeximdin elip ketip, uning bexiƣa birǝr palakǝt kelip ⱪalsa, meni aⱪ qaqlirim bilǝn dǝrd iqidǝ gɵrgǝ qüxürisilǝr› degǝnidi. 30 Əmdi mǝn, ⱪulung, atamning ⱪexiƣa barƣanda, bu bala biz bilǝn billǝ bolmisa, uning jeni bu balining jeniƣa baƣlanƣan bolƣaqⱪa, 31 u balining yoⱪluⱪini kɵrgǝndǝ ɵlüp ⱪalidu. Ⱪulliring bolsa ⱪulung bolƣan aⱪ qaqliⱪ atimizni dǝrd iqidǝ gɵrgǝ qüxürüwǝtkǝn bolimiz. 32 Mǝn ⱪulung, atamƣa bu bala üqün kepil bolup: ‹Əgǝr mǝn uni sening ⱪexingƣa ⱪayturup elip kǝlmisǝm, ɵmürwayǝt atamning aldida gunaⱨkar bolup ⱪalimǝn› degǝnidim. 33 Xunga ɵtünüp ⱪalay, mǝn ⱪulung, bu balining orniƣa bu yǝrdǝ ⱪelip hojamƣa ⱪul bolay. Lekin u bala akiliri bilǝn billǝ ⱪaytip kǝtsun. 34 Qünki bu bala mǝn bilǝn bolmisa, mǝn atamning ⱪexiƣa ⱪandaⱪ baralaymǝn? Atam tartidiƣan azab-oⱪubǝtni kɵrüp qidap turalmaymǝn».