1 Əmma zeminda aqarqiliⱪ intayin eƣir idi. 2 Ular Misirdin elip kǝlgǝn axliⱪni yǝp bolƣanda, atisi ularƣa: «Yǝnǝ berip, bizgǝ biraz axliⱪ elip kelinglar» dedi. 3 Lekin Yǝⱨuda uningƣa jawab berip: «U kixi bizgǝ tǝkitlǝp: ‹Ukanglar silǝr bilǝn billǝ bolmisa, yüzümni ⱨǝrgiz ⱪayta kɵrmǝysilǝr› degǝn. 4 Əgǝr ukimizni biz bilǝn billǝ ǝwǝtsǝng, biz berip, sanga axliⱪ elip kelimiz. 5 Əmma uni ǝwǝtkili unimisang, biz barmaymiz. Qünki u kixi bizgǝ: ‹Ukanglar silǝr bilǝn billǝ bolmisa, yüzümni ⱨǝrgiz ⱪayta kɵrmǝysilǝr› degǝn» dedi. 6 Isra’il ularƣa: «Nemǝ üqün manga yamanliⱪ ⱪilip, u kixigǝ: ‹Yǝnǝ bir ukimiz bar› dǝp eyttinglar?» dedi. 7 Ular jawab berip: «U kixi biz wǝ jǝmǝtimizning ǝⱨwalini koqilap: ‹Atanglar ⱨazir ⱨayatmu? Baxⱪimu ⱪerindixinglar barmu?› dǝp soriwidi, biz uning so’aliƣa muwapiⱪ jawab bǝrduⱪ. Biz uning bizgǝ: ‹Ukanglarni elip kelinglar› dǝydiƣinini nǝdin bilǝttuⱪ?» dedi. 8 Yǝⱨuda atisi Isra’ilƣa: «Balini mǝn bilǝn ǝwǝtsǝng, biz dǝrⱨal ⱪozƣilip yolƣa qiⱪimiz. Xundaⱪ ⱪilƣanda, biz wǝ sǝn wǝ balilirimizmu ɵlmǝy ⱨayat ⱪalimiz. 9 Mǝn uningƣa kepil bolimǝn. Sǝn uni mening ⱪolumdin tǝlǝp ⱪilƣin. Əgǝr mǝn uni sening ⱪexingƣa ⱪayturup kelip, aldingda turƣuzup ⱪoymisam, ɵmürwayǝt aldingda gunaⱨkar bolay. 10 Qünki ǝgǝr waⱪitni sozmiƣan bolsaⱪ, bu waⱪitⱪiqǝ ikkinqi ⱪetim berip kelǝttuⱪ» dedi.

11 Andin ularning atisi Isra’il ularƣa mundaⱪ dedi: «Undaⱪ bolsa, mundaⱪ ⱪilinglar: U kixigǝ sowƣat bolsun dǝp, taƣarliringlarƣa bu zeminning ǝng yahxi mewiliridin elip, azƣinǝ mǝlⱨǝm, ⱨǝsǝl, dora-dǝrmǝk, murmǝkki, pistǝ wǝ badammu alƣaq beringlar. 12 Yǝnǝ ⱪolunglarda ikki ⱨǝssǝ pulni wǝ taƣarliringlarning aƣzidiki ⱪayturulƣan pulnimu alƣaq beringlar. Eⱨtimal, bir sǝwǝnlik ɵtkǝn boluxi mumkin. 13 Ukanglarnimu billǝ elip ⱪozƣilip, u kixining yeniƣa yǝnǝ beringlar. 14 Ⱨǝmmigǝ ⱪadir Huda silǝrni u kixining aldida mǝrⱨǝmǝtkǝ erixtürgǝy. Buning bilǝn u u yǝrdiki yǝnǝ bir ⱪerindixinglarni wǝ Bǝnyaminni silǝrgǝ ⱪoxup yolƣa selip ⱪoyar. Bolmisa balilirimdin juda bolƣinim bolƣan».

15 Xuning bilǝn bu adǝmlǝr sowƣatlarni wǝ ⱪolliriƣa ikki ⱨǝssǝ pulni elip, Bǝnyaminnimu elip ⱪozƣilip, Misirƣa berip, Yüsüpning aldida ⱨazir boldi. 16 Yüsüp Bǝnyaminni ular bilǝn billǝ kɵrginidǝ, ƣojidariƣa buyruⱪ berip: «Bu adǝmlǝrni ɵyümgǝ baxlap kirip, mal soyup tamaⱪ tǝyyarliƣin, qünki bu kixilǝr qüxlük tamaⱪni mǝn bilǝn yǝydu» dedi. 17 U kixi Yüsüpning buyruƣini boyiqǝ bu adǝmlǝrni Yüsüpning ɵyigǝ baxlap kirdi. 18 Ular Yüsüpning ɵyigǝ kirgüzülgǝndǝ ⱪorⱪuxup ketip: «Biz qoⱪum awwalⱪi ⱪetim taƣarlirimizda ⱪayturulƣan pulning sǝwǝbidin bu ɵygǝ kirgüzülduⱪ. U bizgǝ ⱨujum ⱪilip, bizni tutup ⱪul ⱪilip, exǝklirimizni tartiwalmaⱪqi bolƣan ohxaydu» deyixti. 19 Ular Yüsüpning ƣojidarining yeniƣa berip, ɵyning dǝrwazisida 20 uningƣa mundaⱪ dedi: «Əy hojam, biz ilgirimu bu yǝrgǝ axliⱪ alƣili kǝlgǝniduⱪ. 21 Biz ɵtǝnggǝ kelip, ɵz taƣarlirimizni aqsaⱪ, ⱨǝr kixining puli ɵz taƣirining aƣzida ɵz peti turuptu. Xunga biz bu pullarni ⱪayturux üqün elip kǝlduⱪ. 22 Axliⱪ elix üqün baxⱪa pulmu elip kǝlduⱪ, ǝmma taƣarlirimizƣa pulni kimning selip ⱪoyƣinini bilmiduⱪ» dedi. 23 U ularƣa: «Hatirjǝm bolunglar, ⱪorⱪmanglar. Silǝrning Hudayinglar wǝ ata-bowiliringlarning Hudasi taƣarliringlarƣa silǝr üqün hǝzinǝ selip ⱪoyƣan ohxaydu. Pulunglar manga tǝgdi» dedi. Andin u Ximonni zindandin elip qiⱪip, ularning yeniƣa elip kǝldi. 24 U kixi ularni Yüsüpning ɵyigǝ baxlap kirip, ularƣa putlirini yuyux üqün su bǝrdi wǝ exǝklirigǝ boƣuz bǝrdi. 25 Andin ular Yüsüpning qüxtǝ kelixigǝ ülgürtüp sowƣatlarni tǝyyarlap ⱪoydi, qünki ular ɵzlirining u yǝrdǝ tamaⱪ yǝydiƣanliⱪini angliƣanidi.

26 Yüsüp ɵygǝ kǝlgǝndǝ, ular ⱪolliridiki sowƣatlarni ɵygǝ, uning aldiƣa elip kirip, bexi yǝrgǝ tǝgküdǝk egilip uningƣa tǝzim ⱪildi. 27 U bolsa ulardin ⱨal-ǝⱨwal sorap: «Silǝr gepini ⱪilƣan ⱪeri atanglar salamǝtmu? U ⱨayatmu?» dǝp soridi. 28 Ular jawab berip: «Ⱪulung atimiz saⱪ-salamǝt, tehi ⱨayattur» dǝp egilip tǝzim ⱪilixti. 29 Andin u bexini kɵtürüp, bir anidin bolƣan ɵz ukisi Bǝnyaminni kɵrüp: «Silǝr manga gepini ⱪilƣan kiqik ukanglar bumu?» dǝp sorap: «Əy oƣlum, Huda sanga mǝrⱨǝmǝt ⱪilsun» dedi. 30 Yüsüp ɵz ukisiƣa bolƣan seƣinix ⱨessiyati tüpǝyli, yiƣliwǝtkili tas ⱪaldi. Xunga u haliy jay izdǝp, aldirap iqkiriki ɵygǝ kirip, u yǝrdǝ taza yiƣlidi. 31 Andin yüzini yuyup qiⱪip, ɵzini besiwelip: «Tamaⱪ tartinglar» dǝp buyrudi. 32 Hizmǝtkarlar uning ɵzigǝ ayrim, ularƣa ayrim wǝ uning bilǝn billǝ bolƣan Misirliⱪlarƣimu ayrim jayda tamaⱪ tartti. Qünki Misirliⱪlar Ibraniylar bilǝn tamaⱪ yeyixni yirginqlik dǝp bilgǝqkǝ, ular bilǝn billǝ tamaⱪ yemǝytti. 33 Yüsüpning ⱪerindaxliri uning udulida, tunjisi tunjiliⱪiƣa yarixa, kiqiki kiqiklikigǝ yarixa olturƣuzulƣini üqün ular ⱨǝyran ⱪelixip bir-birigǝ ⱪaraxti. 34 Andin keyin u aldidiki tamaⱪtin elip bɵlüp bǝrdi. Əmma Bǝnyaminning ⱨǝssisi baxⱪilarningkidin bǝx ⱨǝssǝ kɵp idi. Ular xarab iqip, uning bilǝn hux waⱪit ɵtküzüxti.