1 Birnǝqqǝ waⱪit ɵtkǝndin keyin Misir padixaⱨining saⱪiyi wǝ nawiyi ɵz hojisi bolƣan Misir padixaⱨi aldida hataliⱪ ɵtküzdi. 2 Xuning bilǝn Fir’ǝwn bax saⱪiy wǝ bax naway bolƣan bu ikki orda ǝmǝldariƣa ⱪattiⱪ ƣǝzǝplinip, 3 ularni has pasibanlarning baxliⱪining sariyidiki, Yüsüp solaⱪliⱪ turƣan zindanƣa solap ⱪoydi. 4 Pasibanlarning baxliⱪi Yüsüpni ularƣa hizmǝt ⱪilixⱪa tǝyinlǝp ⱪoydi. Ular solaⱪta bir mǝzgil yetip ⱪaldi. 5 Misir padixaⱨining saⱪiyi wǝ nawiyi zindanda solaⱪliⱪ turƣinida, ikkilisi bir keqidǝ ⱨǝrbiri ɵzigǝ yarixa tǝbiri bar qüx kɵrdi.

6 Ətigini Yüsüp ularning ⱪexiƣa kirginidǝ, ularning ƣǝmkin olturƣinini kɵrüp, 7 ɵzi bilǝn billǝ hojisining ɵyidǝ solaⱪliⱪ turƣan Fir’ǝwnning orda ǝmǝldarliridin: «Bügün nemixⱪa qirayinglar solƣun?» dǝp soridi. 8 Ular uningƣa: «Ikkimiz bir qüx kɵrduⱪ, ǝmma uning tǝbirini eytip beridiƣan kixi yoⱪ» dedi. Yüsüp ularƣa: «Tǝbir berix Hudadin ǝmǝsmu? Qüxni manga eytip beringlar» dedi.

9 Buning bilǝn bax saⱪiy Yüsüpkǝ ɵz qüxini eytip berip: «Qüxümdǝ aldimda bir üzüm teli turƣinini kɵrdüm. 10 Bu üzüm telining üq xehi bar ikǝn. Mana, u bihlap, kɵklǝp, qeqǝklǝp, sapaⱪlirida üzüm pixip sanggilap turuptu. 11 Fir’ǝwnning ⱪǝdǝⱨini ⱪolumda tutup, üzümlǝrni elip Fir’ǝwnning ⱪǝdǝⱨigǝ siⱪip, ⱪǝdǝⱨni uning ⱪoliƣa bǝrdim» dedi. 12 Yüsüp uningƣa mundaⱪ dedi: «Qüxning tǝbiri xuki: Bu üq xah üq kün demǝktur. 13 Üq kün iqidǝ Fir’ǝwn sanga izzǝt ata ⱪilip, seni ⱪaytidin ɵz mǝnsipinggǝ olturƣuzidu. Xuning bilǝn sǝn burun Fir’ǝwngǝ saⱪiy bolƣanda ⱪilƣiningdǝk, yǝnǝ uning ⱪoliƣa ⱪǝdǝⱨ beridiƣan bolisǝn. 14 Lekin ixliring onguxluⱪ bolƣanda, meni yadingƣa kǝltürüp manga ƣǝmhorluⱪ ⱪilƣaysǝn. Fir’ǝwnning aldida mǝn toƣruluⱪ gǝp ⱪilip, meni bu ɵydin qiⱪartⱪaysǝn. 15 Qünki mǝn Ibraniylarning zeminidin naⱨǝⱪ elip ketildim. Bu yǝrdimu meni zindanƣa salƣudǝk bir ix ⱪilmidim».

16 Bax naway bolsa Yüsüpning yahxi tǝbir bǝrginini kɵrüp, uningƣa: «Mǝnmu bir qüxni kɵrdüm. Mana, beximda üq sewǝt aⱪ nan bar ikǝn. 17 Əng üstidiki sewǝttǝ Fir’ǝwn yǝydiƣan ⱨǝr hil nanlar bar ikǝn. Lekin ⱪuxlar beximdiki sewǝttin ularni yemǝktǝ ikǝn» dedi. 18 Yüsüp jawab berip: «Qüxning tǝbiri xuki: Bu üq sewǝt üq kün demǝktur. 19 Üq kün iqidǝ Fir’ǝwn sening bexingni kesip, seni darƣa asidu wǝ ⱪuxlar kelip, gɵxüngni yǝydu» dedi.

20 Üqinqi küni Fir’ǝwnning tuƣulƣan küni bolƣaqⱪa, u ⱨǝmmǝ hizmǝtkarliri üqün bir ziyapǝt ɵtküzüp, ɵz hizmǝtkarlirining arisida bax saⱪiy wǝ bax nawayning «bexini kɵtürdi», 21 xundaⱪki u bax saⱪiyni ⱪaytidin ɵz mǝnsipigǝ olturƣuzup ⱪoydi. U yǝnǝ Fir’ǝwnning ⱪoliƣa ⱪǝdǝⱨ beridiƣan boldi. 22 Lekin bax nawayni Yüsüp tǝbir bǝrgǝndǝk darƣa esiwǝtti. 23 Əmma bax saⱪiy, Yüsüpni ǝslimǝy uni untup ⱪaldi.