1 Yüsüp Misirƣa kǝltürülginidǝ, Fir’ǝwnning bir orda ǝmǝldari, uning pasiban begi Potifar, uni u yǝrgǝ elip kǝlgǝn Isma’iliylarning ⱪolidin setiwaldi. 2 Lekin Pǝrwǝrdigar Yüsüpkǝ yar bolƣaqⱪa, u ixlirida muwǝppǝⱪiyǝtlik adǝm bolup, ɵzining Misirliⱪ hojisining ɵyidǝ turup ⱪaldi. 3 Uning hojisi Pǝrwǝrdigarning uningƣa yar ikǝnlikini wǝ u nemǝ ix ⱪilsa, Pǝrwǝrdigarning uning ⱪoliƣa muwǝppǝⱪiyǝt kǝltürüp bǝrginini kɵrdi.

4 Xuning üqün Yüsüp uning aldida iltipatⱪa erixip, uning hizmitini ⱪilatti. Hojisi uni ɵz ɵyining ƣojidari ⱪilip tǝyinlǝp, barliⱪ tǝ’ǝlluⱪatini uning ⱪoliƣa tapxurdi. 5 U uni ɵyi wǝ barliⱪ tǝ’ǝlluⱪatini baxⱪuruxⱪa ⱪoyƣandin tartip, Pǝrwǝrdigar bu Misirliⱪning ɵyigǝ Yüsüpning sǝwǝbidin bǝrikǝt ata ⱪildi, Pǝrwǝrdigarning bǝrikiti ɵyidiki wǝ daladiki pütün barliⱪiƣa kǝldi. 6 Xuning üqün u pütün barliⱪini Yüsüpning ⱪoliƣa tapxurup ⱪoyup, ɵzi yǝydiƣan nandin baxⱪa nǝrsǝ bilǝn kari bolmidi. Yüsüp ⱪǝddi-ⱪamiti kelixkǝn, qirayliⱪ yigit idi.

7 Birnǝqqǝ waⱪit ɵtkǝndin keyin Yüsüpkǝ uning hojisining ayalining kɵzi qüxüp ⱪaldi. U uningƣa: «Mǝn bilǝn bir orunda yatⱪin» dedi. 8 Əmma u unimay, hojisining ayaliƣa: «Mana, hojam ɵydiki mening ⱪolumda bolƣan barliⱪ nǝrsiliri bilǝn kari yoⱪ. U pütün barliⱪini mening ⱪolumƣa tapxurup ⱪoydi. 9 Bu ɵydǝ mǝndin qong kixi yoⱪ. Sǝndin baxⱪa ⱨeqbir nǝrsini mǝndin ayimidi, qünki sǝn uning ayalidursǝn. Xundaⱪ turuⱪluⱪ, mǝn ⱪandaⱪmu bundaⱪ yamanliⱪni ⱪilip, Huda aldida gunaⱨkar bolay?» dedi. 10 U ⱨǝr küni Yüsüpkǝ gǝp ⱪilsimu, u uning bilǝn yatmidi, uningƣa yeⱪin yolimidi.

11 Bir küni ɵydikilǝrdin ⱨeqkim yoⱪ waⱪtida, Yüsüp ɵz ixi bilǝn ɵygǝ kirsǝ, 12 bu ayal uning toniƣa esiliwelip: «Mǝn bilǝn bir orunda yatⱪin» dedi. Yüsüp tonini uning ⱪolida ⱪaldurup ⱪoyup, ⱪeqip taxⱪiriƣa qiⱪip kǝtti. 13 Ayal uning ɵz tonini uning ⱪolida ⱪaldurup, taxⱪiriƣa ⱪeqip kǝtkinini kɵrgǝndǝ, 14 ɵyidiki hizmǝtkarlirini qaⱪirip, ularƣa: «Ⱪaranglar, bizgǝ ⱨaⱪarǝt ⱪilsun dǝp, erim bir Ibraniy adǝmni bizgǝ elip kǝldi! Bu adǝm ⱪeximƣa kirip, mǝn bilǝn billǝ yatmaⱪqi boldi, lekin mǝn ⱪattiⱪ awaz bilǝn warⱪiridim. 15 U mening yuⱪiri awaz bilǝn warⱪiriƣinimni kɵrgǝndǝ ɵz tonini yenimƣa taxlap ⱪoyup, ⱪeqip taxⱪiriƣa qiⱪip kǝtti» dedi. 16 U uning tonini hojisi ɵygǝ ⱪaytip kǝlgüqǝ ɵz yenida saⱪlap ⱪoydi. 17 Andin uningƣimu ohxax gǝp ⱪilip: «Sǝn elip kǝlgǝn Ibraniy ⱪul manga ⱨaⱪarǝt ⱪilixⱪa ⱪeximƣa kirdi. 18 Lekin mǝn yuⱪiri awaz bilǝn warⱪirisam, u ɵz tonini yenimƣa taxlap, taxⱪiriƣa ⱪeqip kǝtti» dedi. 19 Uning hojisi ɵz ayalining: «Sening ⱪulung manga undaⱪ ⱪildi-mundaⱪ ⱪildi» degǝn sɵzlirini angliƣinida, ⱪattiⱪ ƣǝzǝpkǝ kǝldi. 20 Hojisi Yüsüpni tutup, padixaⱨning mǝⱨbusliri solanƣan orda zindaniƣa solap ⱪoydi. Xuning bilǝn u xu yǝrdǝ solaⱪta yetip ⱪaldi.

21 Lekin Pǝrwǝrdigar Yüsüpkǝ yar bolup, uningƣa meⱨir-xǝpⱪǝt kɵrsitip, gundipayning kɵzidǝ iltipatⱪa erixtürdi. 22 Xundaⱪki, gundipay zindandiki mǝⱨbuslarning ⱨǝmmisini Yüsüpning ⱪoliƣa tapxurdi. U yǝrdiki ⱨǝmmǝ ixlarƣa u mǝs’ul idi. 23 Gundipay uning ⱪolidiki ⱨeq ixtin ǝndixǝ ⱪilmaytti, qünki Pǝrwǝrdigar uningƣa yar bolƣaqⱪa, ⱨǝmmǝ ixlirida Pǝrwǝrdigar uni muwǝppǝⱪiyǝtlik ⱪilatti.