1 U künlǝrdǝ Yǝⱨuda ɵz ⱪerindaxlirining ⱪexidin ayrilip, Adullamlik Hira degǝn bir kixiningkigǝ qüxti. 2 U yǝrdǝ Yǝⱨuda Xu’a isimliⱪ bir Kǝn’aniy adǝmning ⱪizini kɵrüp uni hotunluⱪⱪa elip uning bilǝn billǝ boldi. 3 U ⱨamilidar bolup bir oƣul tuƣdi. Yǝⱨuda uningƣa Er dǝp at ⱪoydi. 4 U yǝnǝ ⱨamilidar bolup bir oƣul tuƣdi, uningƣa Onan dǝp at ⱪoydi. 5 Andin u yǝnǝ ⱨamilidar bolup bir oƣul tuƣup, uningƣa Xela dǝp at ⱪoydi. U tuƣulƣanda Yǝⱨuda Kezibta idi. 6 Yǝⱨuda ɵz tunji oƣli Ergǝ Tamar degǝn bir ⱪizni hotunluⱪⱪa elip bǝrdi. 7 Lekin Yǝⱨudaning tunji oƣli Er Pǝrwǝrdigarning nǝziridǝ yaman bolƣaqⱪa, Pǝrwǝrdigar uni ɵltürdi. 8 Yǝⱨuda Onanƣa: «Sǝn ɵz akangning ayali bilǝn billǝ bolƣin, uni hotunluⱪⱪa elip, akang üqün nǝsil ⱪaldurƣin» dedi. 9 Əmma Onan bu nǝsilning ɵzining bolmaydiƣanliⱪini bilip, akisiƣa nǝsil ⱪaldurmasliⱪ üqün, ⱨǝr ⱪetim akisining ayali bilǝn billǝ bolƣanda, ɵzining mǝniysini yǝrgǝ aⱪturuwetǝtti. 10 Lekin uning bu ⱪilmixi Pǝrwǝrdigarning nǝziridǝ yaman bolƣaq, U unimu ɵltürdi.

11 Andin Yǝⱨuda kelini Tamarƣa: «Oƣlum Xela qong bolƣuqǝ sǝn atangning ɵyidǝ tul olturup turƣin» dedi. Qünki u: Umu akiliriƣa ohxax ɵlüp ketǝrmikin dǝp ⱪorⱪti. Xuning bilǝn Tamar atisining ɵyigǝ ⱪaytip kǝtti.

12 Aridin uzun waⱪit ɵtkǝndin keyin Yǝⱨudaning ayali bolƣan Xu’aning ⱪizi wapat boldi. Yǝⱨuda matǝm tutup tǝsǝlli tapⱪandin keyin, Adullamliⱪ dosti Hira bilǝn billǝ ⱪoy ⱪirⱪiƣuqilirining yeniƣa berix üqün Timnaⱨⱪa qiⱪti. 13 Tamarƣa: «Ⱪeynatang ⱪoylirini ⱪirⱪiƣili Timnaⱨⱪa qiⱪiwatidu» dǝp hǝwǝr yǝtkǝndǝ, 14 u tulluⱪ kiyimlirini seliwetip, qümbilini tartip, yɵginip, Timnaⱨ yolining üstidiki Əna’imning kirix eƣiziƣa berip olturdi. Qünki u, Xela qong bolƣan bolsimu, ɵzining uningƣa hotunluⱪⱪa elip berilmiginini kɵrgǝnidi. 15 U yüzini yepiwalƣini üqün Yǝⱨuda uni bir paⱨixǝ ayal ohxaydu dǝp oylidi. 16 U yolning qetigǝ uning yeniƣa berip, ɵz kelini ikǝnlikini bilmǝy: «Kǝlgin, mǝn sǝn bilǝn billǝ bolay» dedi. U jawab berip: «Mǝn billǝn billǝ bolsang, manga nemǝ berisǝn?» dedi. 17 U uningƣa: «Padamning iqidin bir oƣlaⱪni sanga ǝwǝtip berǝy» dedi. Ayal bolsa: «Sǝn uni ǝwǝtküqǝ manga birǝr nǝrsǝ gɵrügǝ berǝmsǝn?» dǝp soridi. 18 Andin u: «Sanga nemini gɵrügǝ berǝy?» dedi. Ayal: «Ɵz mɵⱨürüng, zunnaring wǝ ⱪolungdiki ⱨasangni gɵrügǝ bǝrgin» dedi. U bularni berip, uning bilǝn billǝ boldi wǝ ayal uningdin ⱨamilidar bolup ⱪaldi. 19 Andin Tamar ornidin turup mengip ketti. U qümbilini eliwetip, tulluⱪ kiyimini kiyiwaldi.

20 Yǝⱨuda bolsa, u ayalning ⱪolidiki gɵrügǝ bǝrgǝnlirini ⱪayturup kǝlsun dǝp, Adullamliⱪ dosti arⱪiliⱪ oƣlaⱪni ǝwǝtti. Əmma u uni tapalmidi. 21 U xu jaydiki adǝmlǝrdin: «Əna’im yolining boyida olturƣan paⱨixǝ ayal ⱪeni?» dǝp sorisa, ular: «Bu yǝrdǝ ⱨeqbir paⱨixǝ ayal yoⱪ idi» dǝp jawab bǝrdi. 22 Buning bilǝn u Yǝⱨudaning yeniƣa ⱪaytip kelip: «Mǝn uni tapalmidim. U jaydiki hǝlⱪmu: ‹Bu yǝrdǝ ⱨeqbir paⱨixǝ ayal yoⱪ idi› deyixti» dedi. 23 Yǝⱨuda: «Boptu, u nǝrsilǝrni u tutup ⱪalsun. Ɵzimizni hijalǝtkǝ ⱪoymayli. Ⱪandaⱪla bolmisun, mǝn oƣlaⱪni ǝwǝttim. Lekin sǝn u ayalni tapalmiding» dedi.

24 Üq ayqǝ ɵtkǝndin keyin Yǝⱨudaƣa: «Sening kelining Tamar buzuⱪqiliⱪ ⱪilip, buning üstigǝ zinadin ⱨamilidar bolup ⱪeliptu» degǝn hǝwǝr yǝtti. Yǝⱨuda: «Uni elip qiⱪinglar, u kɵydürüwetilsun» dedi. 25 Lekin u elip qiⱪirilƣinida, ɵz ⱪeynatisiƣa: «Mǝn mana bu nǝrsilǝrning igisi bolƣan adǝmdin ⱨamilidar bolup ⱪaldim. Əmdi sǝn bu mɵⱨür, zunnar wǝ ⱨasa kimning ikǝnlikini kɵrüp baⱪⱪin» dǝp hǝwǝr ǝwǝtti. 26 Yǝⱨuda bu nǝrsilǝrni tonup ⱪelip: «Mǝn uni oƣlum Xelaƣa elip bǝrmigǝqkǝ, u mǝndin bǝkrǝk ⱨǝⱪliⱪtur» dedi. Xuningdin keyin u uning bilǝn yǝnǝ billǝ bolmidi.

27 Uning tuƣut waⱪti yeⱪinlaxⱪanda, mana, ⱪorsiⱪida ⱪoxkezǝk bar idi. 28 Tuƣutta, balilardin birisi ⱪolini qiⱪiriwidi, tuƣut anisi dǝrⱨal bir toⱪ ⱪizil yipni elip, uning ⱪoliƣa qigip ⱪoyup: «Bu awwal qiⱪti» dedi. 29 Lekin u ⱪolini yǝnǝ iqigǝ tiⱪiwaldi, bu ǝsnada mana uning ⱪerindixi tuƣuldi. Tuƣut anisi: «Sǝn ⱪandaⱪ ⱪilip bɵsüp qiⱪting?» dedi. Xunglaxⱪa uningƣa Pǝrǝz dǝp isim ⱪoyuldi. ^◼   30 Andin keyin ⱪoliƣa toⱪ ⱪizil yip qigilgǝn ⱪerindixi tuƣuldi. Uning ismi Zeraⱨ dǝp ⱪoyuldi.