1 Xinarning padixaⱨi Amrafǝl, Əllasarning padixaⱨi Aryok, Elamning padixaⱨi Kedorla’omǝr wǝ Goyimning padixaⱨi Tidalning künliridǝ, 2 ular Sodomning padixaⱨi Bera, Gomorraning padixaⱨi Birxa, Admaning padixaⱨi Xinab, Ziboyimning padixaⱨi Xǝmebǝr wǝ Bela dǝp atalƣan Zo’arning padixaⱨiƣa ⱪarxi jǝnggǝ atlandi. 3 Ularning ⱨǝmmisi Siddim wadisiƣa, yǝni ‹Xor Dengiz› wadisiƣa yiƣildi. 4 Ular on ikki yilƣiqǝ Kedorla’omǝrgǝ tǝwǝ bolup, on üqinqi yili uningƣa ⱪarxi isyan kɵtürgǝnidi. 5 On tɵtinqi yili Kedorla’omǝr wǝ uning bilǝn billǝ bolƣan padixaⱨlar kelip, Refa’iylarni Axtarot-Ⱪarnayimda, Zuziylarni Ⱨamda wǝ Emiylarni Xawǝⱨ-Ⱪiryatayimda tarmar ⱪildi. ^◼   6 Ular Horiylarnimu ɵzining teƣi bolƣan Se’irda mǝƣlup ⱪilip, qɵlning yenidiki Əl-Paranƣiqǝ ⱪoƣlap bardi. 7 Andin keyin ular yenip, En-Mixpat dǝp atalƣan Ⱪadǝxkǝ kelip, Amalǝkiylǝrning ⱨǝmmǝ zeminini besip, Hazazon-Tamarda yaxawatⱪan Amoriylarnimu tarmar ⱪildi.

8 Xuning bilǝn Sodomning padixaⱨi, Gomorraning padixaⱨi, Admaning padixaⱨi, Ziboyimning padixaⱨi wǝ Bela dǝp atalƣan Zo’arning padixaⱨi yolƣa qiⱪip, Siddim wadisida, 9 Elamning padixaⱨi Kedorla’omǝr, Goyimning padixaⱨi Tidal, Xinarning padixaⱨi Amrafǝl wǝ Əllasarning padixaⱨi Aryok degǝnlǝrgǝ ⱪarxi jǝng sepi tüzüxti, yǝni tɵt padixaⱨⱪa ⱪarxi bǝx padixaⱨ. 10 Lekin Siddim wadisining ⱨǝmmǝ yeridǝ ⱪarimay orǝkliri bar idi. Sodom wǝ Gomorraning padixaⱨliri ⱪeqiwatⱪinida u orǝklǝrgǝ qüxüp kǝtti. Ⱪalƣanlar bolsa taƣⱪa ⱪeqip kǝtti. 11 Ƣalib kǝlgǝnlǝr Sodom bilǝn Gomorraning ⱨǝmmǝ mal-mülkini wǝ barliⱪ ozuⱪ-tülüklirini elip kǝtti. 12 Ular Sodomda turuwatⱪan Abramning jiyǝni Lotnimu mal-mülükliri bilǝn ⱪoxup elip kǝtti.

13 Lekin ⱪutulup ⱪalƣan bir kixi berip buni Ibraniy Abramƣa mǝlum ⱪildi. Xu qaƣda u Əxkol bilǝn Anǝrning ⱪerindixi bolƣan Amoriy Mamrǝning dub dǝrǝhliki ǝtrapida turatti. Bu kixilǝrning ⱨǝmmisi Abramning ittipaⱪdaxliri idi. 14 Abram ⱪerindixining ǝsirgǝ qüxüp ⱪalƣinini angliƣinida, ɵz ɵyidǝ tuƣulup yetixkǝn, qeniⱪⱪan üq yüz on sǝkkiz adǝmni baxlap qiⱪip, düxmǝnlǝrni Dan degǝn jayƣiqǝ ⱪoƣlap bardi. 15 Keqisi u adǝmlirini birⱪanqǝ ⱪisimƣa bɵlüp, ularƣa ⱨujum ⱪilip, ularni mǝƣlup ⱪilip, Dǝmǝxⱪning ximal tǝripidiki Ⱨoba degǝn jayƣiqǝ ⱪoƣlap bardi. 16 U ⱨǝmmǝ mal-mülükni ⱪayturuwelip, ɵz ⱪerindixi Lotnimu ⱪutⱪuzup, uning mal-mülkini, xundaⱪla ayallarni wǝ ⱪalƣan adǝmlarni yandurup kǝldi.

17 U Kedorla’omǝr wǝ uning bilǝn billǝ bolƣan padixaⱨlarni mǝƣlup ⱪilip ⱪaytip keliwatⱪinida, Sodomning padixaⱨi Xawǝⱨ wadisi dǝp atalƣan padixaⱨ wadisida uni ⱪarxi elixⱪa qiⱪti. 18 Salemning padixaⱨi Mǝlkisadiⱪ bolsa uning aldiƣa nan bilǝn xarab elip kǝldi. U ⱨǝmmidin uluƣ Hudaning kaⱨini idi. 19 U uning ⱨǝⱪⱪidǝ hǝyrlik du’a ⱪilip: «Asman bilǝn yǝrni yaratⱪan ⱨǝmmidin uluƣ Huda Abramƣa bǝrikǝt ata ⱪilƣay! 20 Düxmǝnliringni ⱪolungƣa tapxurup bǝrgǝn ⱨǝmmidin uluƣ Hudaƣa ⱨǝmdusana bolƣay» dedi. Abram uningƣa ⱨǝmmǝ nǝrsilǝrning ondin birini bǝrdi.

21 Sodomning padixaⱨi Abramƣa: «Manga hǝlⱪni bǝrgin, mal-mülük ɵzünggǝ ⱪalsun» dedi. 22 Lekin Abram Sodomning padixaⱨiƣa jawab berip: «Mǝn asman bilǝn yǝrni yaratⱪan Pǝrwǝrdigarƣa, ⱨǝmmidin uluƣ Hudaƣa ⱪol kɵtürüp ⱪǝsǝm ⱪilimǝnki, 23 mǝn sǝndin ⱨeqⱪandaⱪ nǝrsǝ, ⱨǝtta bir tal yip yaki qoruⱪning bir boƣⱪuqini almaymǝn. Bolmisa, sǝn: ‹Mǝn Abramni bay ⱪilip ⱪoydum› deyixing mumkin. 24 Buning üqün yigitlǝrning yeginidin baxⱪa ⱨeqnemini almaymǝn. Manga ⱨǝmraⱨ bolƣan Anǝr, Əxkol wǝ Mamrǝ bolsa ɵzlirigǝ tegixliklirini alsun» dedi.