1 Abram Misirdin qiⱪip, ayali wǝ pütün barliⱪini elip, Lot bilǝn billǝ jǝnubiy zeminƣa bardi. 2 Abram intayin bay bolup, nurƣun qarwa mal wǝ altun-kümüxliri bar idi. 3 U kɵqüp yürüp, jǝnubiy zemindin Bǝytǝlgǝ yetip, Bǝytǝl bilǝn Ⱨayning otturisida ɵzi ilgiri qedir tikip, 4 ⱪurbangaⱨ yasiƣan jayƣa ⱪaytip kǝldi. Abram u yǝrdǝ Pǝrwǝrdigarning namini qaⱪirip ibadǝt ⱪildi.

5 Abram bilǝn mangƣan Lotningmu ⱪoy-kala wǝ qedirliri bar idi. 6 Lekin zemin ularning billǝ turuxiƣa yetixmidi, qünki ularning qarwa malliri xunqilik kɵp idiki, ular u yǝrdǝ billǝ turalmidi. 7 Xu sǝwǝbtin Abramning padiqiliri bilǝn Lotning padiqilirining arisida jedǝl qiⱪti. U qaƣda Kǝn’aniylar bilǝn Pǝrizziylǝr xu zeminda turatti. 8 Xunga Abram Lotⱪa: «Biz ⱪerindax bolƣaqⱪa, sǝn bilǝn mening aramda, mening padiqilirim bilǝn sening padiqiliringning arisida jedǝl qiⱪmisun. 9 Mana, pütün zemin sening aldingda ǝmǝsmu? Əmdi sǝn mǝndin ayrilƣin. Əgǝr sǝn sol tǝrǝpkǝ barsang, mǝn ong tǝrǝpkǝ baray. Əgǝr sǝn ong tǝrǝpkǝ barsang, mǝn sol tǝrǝpkǝ baray» dedi.

10 Lot nǝzǝr selip, pütün I’ordan dǝryasi ǝtrapidiki zeminlarning süyi mol ikǝnlikini kɵrdi. U yǝr Pǝrwǝrdigar Sodom bilǝn Gomorrani wǝyran ⱪilmastin ilgiri Pǝrwǝrdigarning beƣiƣa ohxaytti, Zo’ar degǝn jayiƣiqǝ Misir zeminidǝk idi. 11 Xuning bilǝn Lot ɵzigǝ pütün I’ordan tüzlǝnglikini talliwelip, xǝrⱪ tǝrǝpkǝ kɵqti. Xundaⱪ ⱪilip ular bir-biridin ayrilip kǝtti.

12 Abram Kǝn’an zeminida turup ⱪaldi. Lot bolsa tüzlǝngliktiki xǝⱨǝrlǝrdǝ olturaⱪlixip, Sodomƣiqǝ qedirlirini tikti. 13 Əmma Sodomning adǝmliri Pǝrwǝrdigarning nǝziridǝ naⱨayiti yaman wǝ eƣir gunaⱨkarlar idi.

14 Lot ayrilip kǝtkǝndin keyin, Pǝrwǝrdigar Abramƣa sɵzlǝp: «Sǝn kɵzliringni eqip, ɵzüng turƣan jaydin tartip, ximal, jǝnub, xǝrⱪ wǝ ƣǝrb tǝrǝplǝrgǝ nǝzǝr selip ⱪariƣin. 15 Qünki sǝn kɵrüwatⱪan bu zeminning ⱨǝmmisini Mǝn ǝbǝdkiqǝ sanga wǝ nǝslinggǝ berimǝn. 16 Sening nǝslingni yǝrdiki ⱪumdǝk kɵp ⱪilimǝn. Əgǝr bir kixi yǝrdiki ⱪumni saniyalisa, sening nǝslingningmu sanilixi mumkin bolidu. 17 Sǝn ǝmdi ornungdin turup, bu zeminni uzunluⱪi wǝ kǝngliki boyiqǝ aylinip qiⱪⱪin, qünki Mǝn uni sanga berimǝn» dedi. 18 Xuning bilǝn Abram qedirlirini yiƣip, Hebronning yenidiki Mamrǝning dub dǝrǝhlikining yeniƣa berip olturaⱪlaxti. U xu yǝrdǝ Pǝrwǝrdigarƣa bir ⱪurbangaⱨ yasidi.