Babilning munari
11
1 U zamanda pütün yǝr yüzining tili wǝ sɵzi bir idi. 2 Lekin xundaⱪ boldiki, ular xǝrⱪ tǝrǝpkǝ sǝpǝr ⱪilip, Xinar zeminida bir tüzlǝnglikni tepip, u yǝrdǝ olturaⱪlaxti. 3 Ular bir-birigǝ: «Kelinglar, biz hix ⱪuyup, otta pixurayli» deyixti. Xundaⱪ ⱪilip, ular tax orniƣa hix, lay orniƣa ⱪarimay ixlitixkǝ baxlidi. 4 Ular yǝnǝ: «Kelinglar, ǝmdi ɵzimizgǝ bir xǝⱨǝr bina ⱪilip, uqi asmanƣa taⱪaxⱪudǝk bir munar yasap, ɵz namimizni qiⱪirayli. Xundaⱪ ⱪilsaⱪ pütün yǝr yüzigǝ tarⱪilip kǝtmǝymiz» deyixti. 5 Bu qaƣda Pǝrwǝrdigar adǝm balilirining bina ⱪiliwatⱪan xǝⱨǝr wǝ munarini kɵrgili qüxti. 6 Pǝrwǝrdigar: «Mana, ular bir jama’ǝttur, ⱨǝmmisining tilimu birdur, bu ularning ⱪilidiƣan ixining baxlinixidur. Bundin keyin ularning niyǝt ⱪilip oyliƣan ixlirining ǝmǝlgǝ exixiƣa ⱨeqnemǝ tosalƣu bolalmaydu. 7 Kelinglar, Biz tɵwǝngǝ qüxüp, bir-birini qüxinǝlmǝsliki üqün ularning tilini ⱪalaymiⱪanlaxturuwetǝyli» dedi. 8 Xundaⱪ ⱪilip Pǝrwǝrdigar ularni u jaydin pütün yǝr yüzigǝ taritiwǝtti. Buning bilǝn ular xǝⱨǝrni yasaxtin tohtap ⱪaldi. 9 Pǝrwǝrdigar u yǝrdǝ dunyaning tilini ⱪalaymiⱪanlaxturuwǝtkǝqkǝ, u jayning nami Babil dǝp ataldi. Pǝrwǝrdigar ularni u jaydin pütün yǝr yüzigǝ taritiwǝtti. ◼ Xemning ǝwladliri
10 Xemning nǝslining bayani mundaⱪ: Topandin ikki yil keyin, Xem yüz yaxⱪa kirgǝndǝ, uningdin Arpahxad tɵrǝldi. 11 Arpahxad tuƣulƣandin keyin, Xem yǝnǝ bǝx yüz yil yaxap, yǝnǝ oƣul-ⱪiz pǝrzǝntlǝr kɵrdi.
12 Arpahxad ottuz bǝx yaxⱪa kirgǝndǝ, uningdin Xalaⱨ tɵrǝldi. 13 Xalaⱨ tuƣulƣandin keyin, Arpahxad yǝnǝ tɵt yüz üq yil yaxap, yǝnǝ oƣul-ⱪiz pǝrzǝntlǝr kɵrdi.
14 Xalaⱨ ottuz yaxⱪa kirgǝndǝ, uningdin Ebǝr tɵrǝldi. 15 Ebǝr tuƣulƣandin keyin, Xalaⱨ yǝnǝ tɵt yüz üq yil yaxap, yǝnǝ oƣul-ⱪiz pǝrzǝntlǝr kɵrdi.
16 Ebǝr ottuz tɵt yaxⱪa kirgǝndǝ, uningdin Pǝlǝg tɵrǝldi. 17 Pǝlǝg tuƣulƣandin keyin, Ebǝr yǝnǝ tɵt yüz ottuz yil yaxap, yǝnǝ oƣul-ⱪiz pǝrzǝntlǝr kɵrdi.
18 Pǝlǝg ottuz yaxⱪa kirgǝndǝ, uningdin Ra’u tɵrǝldi. 19 Ra’u tuƣulƣandin keyin, Pǝlǝg yǝnǝ ikki yüz toⱪⱪuz yil yaxap, yǝnǝ oƣul-ⱪiz pǝrzǝntlǝr kɵrdi.
20 Ra’u ottuz ikki yaxⱪa kirgǝndǝ, uningdin Seruh tɵrǝldi. 21 Seruh tuƣulƣandin keyin, Ra’u yǝnǝ ikki yüz yǝttǝ yil yaxap, yǝnǝ oƣul-ⱪiz pǝrzǝntlǝr kɵrdi.
22 Seruh ottuz yaxⱪa kirgǝndǝ, uningdin Naⱨor tɵrǝldi. 23 Naⱨor tuƣulƣandin keyin, Seruh yǝnǝ ikki yüz yil yaxap, yǝnǝ oƣul-ⱪiz pǝrzǝntlǝr kɵrdi.
24 Naⱨor yigirmǝ toⱪⱪuz yaxⱪa kirgǝndǝ, uningdin Tǝraⱨ tɵrǝldi. 25 Tǝraⱨ tuƣulƣandin keyin, Naⱨor yǝnǝ bir yüz on toⱪⱪuz yil yaxap, yǝnǝ oƣul-ⱪiz pǝrzǝntlǝr kɵrdi.
26 Tǝraⱨ yǝtmix yaxⱪa kirgǝndǝ, uningdin Abram, Naⱨor wǝ Ⱨaran tɵrǝldi.
27 Tǝraⱨning nǝslining bayani mundaⱪ: Tǝraⱨdin Abram, Naⱨor wǝ Ⱨaran tɵrǝldi. Ⱨarandin Lot tɵrǝldi. 28 Lekin Ⱨaran, ɵz yurti bolƣan Kaldaniylarning zeminidiki Ur xǝⱨiridǝ atisi Tǝraⱨ tehi ⱨayat waⱪtida wapat boldi. 29 Abram wǝ Naⱨor bolsa ɵzlirigǝ hotun aldi. Abramning ayalininng ismi Saray idi. Naⱨorning ayali Ⱨaranning ⱪizi bolup, ismi Milka idi. Ⱨaran Milka wǝ Yiskaⱨning atisi idi. 30 Lekin Saray tuƣmas bolƣaqⱪa, uning balisi yoⱪ idi. 31 Tǝraⱨ oƣli Abramni, yǝnǝ bir oƣli Ⱨaranning balisi bolƣan nǝwrisi Lotni wǝ oƣli Abramning ayali bolƣan ɵz kelini Sarayni elip, Kǝn’an zeminiƣa berix üqün, Kaldaniylarning zeminidiki Urdin qiⱪip kǝtti. Əmma ular Ⱨaran degǝn jayƣa yǝtkǝndǝ, u yǝrdǝ olturaⱪlixip ⱪaldi. 32 Tǝraⱨ ikki yüz bǝx yil ɵmür kɵrüp, Ⱨaranda wapat boldi.