1 Huda Nuⱨ wǝ uning oƣulliriƣa bǝrikǝt ata ⱪilip, ularƣa: «Silǝr nǝsil ⱪaldurup kɵpiyip, yǝrni toldurunglar. 2 Yǝr yüzidiki ⱨǝmmǝ janiwarlar wǝ ⱨawadiki uqar ⱪanatlar silǝrdin ⱪorⱪup wǝⱨimigǝ qüxidu. Yǝrdǝ midirlaydiƣan janiwarlarning ⱨǝmmisi wǝ sudiki barqǝ beliⱪlar ⱪolliringlarƣa tapxurulƣandur. 3 Ⱨǝmmǝ midirlaydiƣan janiwarlar silǝrgǝ ozuⱪluⱪ bolsun. Mǝn silǝrgǝ ot-giyaⱨlarni bǝrgǝndǝk, ǝmdi bularning ⱨǝmmisini silǝrgǝ berimǝn. 4 Əmma jeni, yǝni ⱪeni bar gɵxni yemǝnglar. 5 Mǝn silǝrning ⱪeninglar tɵkülsǝ uning ⱨesabini qoⱪum soraymǝn, ⱨǝr ⱨaywandin wǝ ⱨǝr insanning ⱪolidin uning ⱨesabini soraymǝn. Ⱨǝr insanning ⱪerindixidin insan ⱨayatining ⱨesabini soraymǝn. ^◼   6 Kimki insan ⱪeni tɵksǝ, uning ⱪenimu insan tǝripidin tɵkülidu. Qünki Huda insanni ɵz obrazida yaratⱪandur. 7 Əmdi silǝr nǝsil ⱪaldurup kɵpiyinglar. Yǝr yüzigǝ kǝng tarⱪilip kɵpiyinglar» dedi.

8 Andin Huda Nuⱨ bilǝn uning oƣulliriƣa sɵz ⱪilip: 9 «Mana, silǝr wǝ silǝrdin keyin kelidiƣan ǝwladliringlar bilǝn, 10 xundaⱪla silǝr bilǝn birgǝ bolƣan ⱨǝr janiwar, uqar ⱪanat, qarwa mal wǝ yawayi ⱨaywan bilǝn, kemidin qiⱪⱪan ⱨǝmmǝ janiwar bilǝn, yǝr yüzidiki ⱨeqbir ⱨaywanni ⱪoymay, ⱨǝmmisi bilǝn Mǝn ɵz ǝⱨdǝmni tüzimǝn. 11 Xundaⱪki, ⱨǝmmǝ janliⱪlar yǝnǝ topanning süyi bilǝn yoⱪitilmaydu wǝ yǝnǝ topan kelip, yǝr yüzini wǝyran ⱪilmaydu dǝp, silǝr bilǝn ǝⱨdǝmni tüzimǝn» dedi. 12 Huda yǝnǝ sɵz ⱪilip: «Mǝn silǝr wǝ ⱪexinglardiki ⱨǝmmǝ janiwarlar bilǝn tüzidiƣan mǝnggülük ǝⱨdǝm üqün bir bǝlgǝ bolsun, 13 Mening bilǝn yǝrning otturisida bir alamǝt bolsun dǝp, rǝnglik yayimni bulutlarƣa ⱪoyup ⱪoyimǝn. 14 Mǝn yǝrning üstigǝ bulut ǝwǝtkinimdǝ wǝ rǝnglik yay kɵrünginidǝ, 15 Ɵzüm silǝr bilǝn ⱨǝmmǝ janliⱪlar bilǝn tüzgǝn ǝⱨdǝmni esimgǝ kǝltürimǝn. Bundin keyin ⱨǝmmǝ janliⱪlarni ⱨalak ⱪilidiƣan topan ⱪayta bolmaydu. 16 Ⱪaqanki bulutlar arisida rǝnglik yayni kɵrsǝm, Mǝn Huda yǝr yüzidiki ⱨǝmmǝ janliⱪlar bilǝn tüzgǝn mǝnggülük ǝⱨdǝmni esimgǝ kǝltürimǝn» dedi. 17 Huda Nuⱨⱪa yǝnǝ: «Mana, bu Mǝn Ɵzüm bilǝn yǝr yüzidiki barliⱪ janliⱪlar otturisida tüzgǝn ǝⱨdǝmning bǝlgisi bolsun» dedi.

18 Nuⱨning kemidin qiⱪⱪan oƣulliri Xem, Ham wǝ Yafǝt idi. Ham Kǝn’anning atisi boldi. 19 Mǝzkur üqǝylǝn Nuⱨning oƣulliri bolup, bularning nǝslidin pütün yǝr yüzi awat boldi. 20 Nuⱨ deⱨⱪanqiliⱪ ⱪilixⱪa baxlap, bir üzümzarliⱪ bǝrpa ⱪildi. 21 U xarabidin iqip mǝst bolup, ɵz qedirida yalingaq yetip ⱪaldi. ^◼   22 Kǝn’anning atisi Ham kelip, atisining ǝwritini kɵrüp, sirtⱪa qiⱪip, ikki ⱪerindixiƣa hǝwǝr bǝrdi. 23 Xuning bilǝn Xem wǝ Yafǝt bir yepinqini elip, mürilirigǝ artip, arⱪiqǝ mengip kirip, atisining ǝwritini yepip ⱪoydi. Ular yüzlirini arⱪiƣa burap, atisining ǝwritini kɵrmidi. 24 Nuⱨ xarabning kǝypidin yexilginidǝ, kiqik oƣlining uningƣa nemǝ ⱪilƣinini bilip, 25 «Kǝn’an lǝnǝt bolsun, u ⱪerindaxlirining ⱪullirining ⱪuli bolsun» dǝp ⱪarƣidi. 26 Andin u yǝnǝ sɵzlǝp: «Xemning Hudasi Pǝrwǝrdigarƣa ⱨǝmdusana bolƣay, ǝmma Kǝn’an Xemning ⱪuli bolsun. 27 Huda Yafǝtni awutsun, u Xemning qedirlirida tursun, ǝmma Kǝn’an bolsa uning ⱪuli bolsun» dedi. 28 Nuⱨ topandin keyin yǝnǝ üq yüz ǝllik yil yaxidi. 29 Bu tǝriⱪidǝ Nuⱨ jǝm’iy toⱪⱪuz yüz ǝllik yil ɵmür kɵrüp, wapat boldi.