1 Andin keyin Huda Nuⱨni yad etip, uning bilǝn kemidǝ bolƣan ⱨǝmmǝ janiwar wǝ barqǝ qarwa malni esigǝ kǝltürdi. Huda yǝr yüzigǝ xamal qiⱪardi. Xuning bilǝn sular pǝsiyixkǝ baxlidi. 2 Qongⱪur sularning bulaⱪliri wǝ asmanning pǝnjiriliri etildi. Asmandin yaƣⱪan ⱪattiⱪ yamƣur tohtidi. 3 Sular bara-bara yǝr yüzidin yandi. Bir yüz ǝllik kün ɵtkǝndin keyin su heli azlap ⱪalƣanidi. 4 Yǝttinqi ayning on yǝttinqi küni, kemǝ Ararat taƣliri üstidǝ tohtidi. 5 Su oninqi ayƣiqǝ dawamliⱪ pǝslidi. Oninqi ayning birinqi küni taƣlarning qoⱪⱪiliri kɵrünüxkǝ baxlidi.

6 Ⱪiriⱪ kündin keyin Nuⱨ kemigǝ ornatⱪan pǝnjirisini eqip, 7 bir ⱪuzƣunni sirtⱪa ⱪoyup bǝrdi. Yǝr yüzidin su tartilip ⱪurup kǝtküqǝ, u aylinip uqup yürdi. 8 Andin keyin Nuⱨ sularning yǝr yüzidin tartilƣan-tartilmiƣinini bilix üqün bir kǝptǝrni sirtⱪa ⱪoyup bǝrdi. 9 Əmma pütün yǝr yüzidǝ su bolƣaqⱪa, kǝptǝr putini ⱪoyƣili yǝr tapalmay, kemigǝ uning yeniƣa ⱪaytip kǝldi. Nuⱨ ⱪolini sunup uni tutup, kemi iqigǝ elip kirdi. 10 U yǝnǝ yǝttǝ kün saⱪlap, andin kǝptǝrni tǝkrar kemidin sirtⱪa ⱪoyup bǝrdi. 11 Kǝptǝr ahxam waⱪtida uning yeniƣa ⱪaytip kǝlginidǝ, dǝrwǝⱪǝ, tumxuⱪida zǝytunning yengi üzülgǝn bir yopurmiⱪi bar idi. Nuⱨ xuningdin sularning yǝr yüzidin tartilƣinini bildi. 12 Andin u yǝnǝ yǝttǝ kün saⱪliƣandin keyin, kǝptǝrni tǝkrar sirtⱪa ⱪoyup bǝrdi, ǝmma bu ⱪetim kǝptǝr ⱪaytip kǝlmidi. 13 Nuⱨ altǝ yüz bir yaxⱪa kirgǝn yili, birinqi ayning birinqi küni, su yǝr yüzidin tartilip ⱪuruƣanidi. Nuⱨ kemining üstini eqip ⱪarisa, yǝr yüzining ⱪuruƣinini kɵrdi. 14 Ikkinqi ayning yigirmǝ yǝttinqi küni, yǝr yüzi pütünlǝy ⱪuruƣanidi.

15 Huda Nuⱨⱪa sɵz ⱪilip: 16 «Sǝn ayaling, oƣulliring wǝ oƣulliringning ayallirini elip, kemidin qiⱪⱪin. 17 Ɵzüng bilǝn billǝ bolƣan barqǝ janiwarlarni, yǝni uqar ⱪanatlar, qarwa mal wǝ yǝrdǝ ɵmiligüqi janiwarlarning ⱨǝmmisini ɵzüng bilǝn ⱪoxup kemidin qiⱪarƣin. Ular yǝr yüzidǝ yeyilip, nǝsil ⱪaldurup zeminda awusun» dedi. 18 Xuning bilǝn, Nuⱨ ɵz ayali, oƣulliri wǝ oƣullirining ayalliri bilǝn billǝ sirtⱪa qiⱪti. 19 Ⱨǝmmǝ janiwarlar, yǝni ɵmiligüqi janiwarlar, uqar ⱪanatlar wǝ yǝrdǝ ɵmilǝydiƣan janiwarlarning ⱨǝrⱪaysisi ɵz türliri boyiqǝ kemidin qiⱪti.

20 Nuⱨ Pǝrwǝrdigar üqün bir ⱪurbangaⱨ yasap, ⱨǝr hil pak janiwar wǝ ⱨǝr hil pak uqar ⱪanattin elip, ⱪurbangaⱨning üstidǝ ⱪurbanliⱪ ⱪilip kɵydürdi. 21 Pǝrwǝrdigar hux puraⱪni purap, kɵnglidǝ: «Adǝmning kɵnglining niyiti kiqikidin tartip yaman bolsimu, Mǝn adǝm tüpǝylidin yǝr yüzigǝ yǝnǝ lǝnǝt ⱪilmaymǝn wǝ bu ⱪetim ⱪilƣinimdǝk barliⱪ janliⱪlarni yǝnǝ ɵltürüwǝtmǝymǝn. 22 Yǝr yüzi mǝwjutla bolidikǝn terim-yiƣim, issiⱪ-soƣuⱪ, ⱪix-yaz, keqǝ-kündüzmu tohtap ⱪalmaydu» dedi.