1 Andin Huda Nuⱨⱪa mundaⱪ dedi: «Sǝn ⱨǝmmǝ a’ilǝngdikilǝr bilǝn kemigǝ kirgin, qünki bu nǝsil iqidǝ seni aldimda ⱨǝⱪⱪaniy dǝp kɵrdüm. 2 Ⱨǝmmǝ pak ⱨaywanlarning ǝrkǝk-qixisidin yǝttǝ jüptin, napak ⱨaywanlarning ǝrkǝk-qixisidin bir jüptin, 3 ⱨawadiki uqar ⱪanatlarning ǝrkǝk-qixisidinmu yǝttǝ jüptin eliwalƣin. Pütün yǝr yüzidǝ ularning uruⱪining tirik saⱪlinip, ⱪayta kɵpiyixi üqün ularni ɵzüng bilǝn billǝ elip kirgin. 4 Qünki yǝttǝ kündin keyin Mǝn yǝr yüzigǝ ⱪiriⱪ keqǝ-kündüz yamƣur yaƣdurup, Ɵzüm yaratⱪan ⱨǝmmǝ janliⱪlarni yǝr yüzidin yoⱪitimǝn». 5 Nuⱨ Pǝrwǝrdigar uningƣa buyruƣanning ⱨǝmmisigǝ ǝmǝl ⱪildi.

6 Yǝr yüzini topan basⱪanda Nuⱨ altǝ yüz yaxta idi. 7 Nuⱨ oƣullirini, ayalini wǝ oƣullirining ayallirini elip, topandin ⱪutulup ⱪelix üqün kemigǝ kirdi. 8 Pak ⱨaywan wǝ napak ⱨaywanlar bolsun, uqar ⱪanat wǝ yǝrdǝ ɵmilǝydiƣan ⱨǝr hil janiwar bolsun, 9 ⱨǝmmisi ikkidin-ikkidin ǝrkǝk-qixi bolup, Huda Nuⱨⱪa buyruƣandǝk Nuⱨning aldiƣa kelip kemigǝ kirdi. 10 Yǝttǝ kündin keyin yǝr yüzini topan süyi besixⱪa baxlidi. 11 Nuⱨning ɵmrining altǝ yüzinqi yili ikkinqi ayning on yǝttinqi küni, qong qongⱪur sularning tǝgliridiki bulaⱪlar yerildi wǝ asmanning pǝnjiriliri eqilip kǝtti. 12 Ⱪiriⱪ keqǝ-kündüzgiqǝ yǝr yüzigǝ yamƣur yaƣdi. 13 Topan baxlanƣan küni Nuⱨ, Nuⱨning Xem, Ham wǝ Yafǝt degǝn oƣulliri, Nuⱨning ayali wǝ oƣullirining üq ayali kemigǝ kirdi. 14 Ular bilǝn ⱨǝr hil yawayi ⱨaywan, ⱨǝr hil qarwa mal, ⱨǝr hil yǝrdǝ ɵmiligüqi janiwar wǝ ⱨǝr hil uqar ⱪanatlar, yǝni ⱪuxlar wǝ ⱪaniti bar janiwarlarning ⱨǝr türi, ⱨǝm kemigǝ kirdi. 15 Nǝpǝs alidiƣan ⱨǝr türlük janliⱪ ikkidin-ikkidin bolup, Nuⱨning aldiƣa kelip kemigǝ kirdi. 16 Hudaning buyruƣinidǝk ⱨǝr hil janliⱪlardin jüp-jüp kirgǝndin keyin, Pǝrwǝrdigar ixikni taⱪap ⱪoydi. 17 Ⱪiriⱪ küngiqǝ topan yǝr yüzini basti. Su ulƣiyip, kemini kɵtürdi. Kemǝ yǝrdin yuⱪiri kɵtürülüp kǝtti. 18 Su ulƣiyip, yǝr yüzidǝ tehimu ɵrlǝp kǝtkǝndǝ, kemǝ su yüzidǝ lǝylǝp mangdi. 19 Yǝr yüzidǝ su xunqilik ɵrlidiki, asmanning astidiki pütün egiz taƣlar su astida ⱪaldi. 20 Sular taƣlarning üsitdin on bǝx gǝz exip, taƣlarni ⱪaplidi. ^◼   21 Buning bilǝn yǝr yüzidǝ ⱨǝrikǝt ⱪilidiƣan barliⱪ janliⱪlar, uqar ⱪanatlar, qarwa mal, yawayi ⱨaywanlar wǝ yǝrdǝ ɵmilǝydiƣan ⱨǝmmǝ ⱪurt-ⱪongƣuz wǝ adǝmlǝrning ⱨǝmmisi ɵldi. 22 Ⱪuruⱪluⱪta yürüp burnida ⱨayatliⱪ nǝpisi bar bolƣanlarning ⱨǝmmisi ɵlüp kǝtti. 23 Xundaⱪki, yǝr yüzidiki jeni barlarning ⱨǝmmisi, mǝyli insan yaki qarwa mal bolsun, ɵmiligüqi janiwar yaki ⱨawadiki uqar ⱪanatlar bolsun, ⱨǝmmisi ⱨalak bolup yǝr yüzidin yoⱪ bolup kǝtti. Pǝⱪǝtla Nuⱨ wǝ kemidǝ uning bilǝn billǝ turƣanlar ⱪutulup ⱪaldi. 24 Su yǝr yüzini bir yüz ǝllik küngiqǝ besip turdi.