1 Adǝmlǝr yǝr yüzidǝ kɵpiyixkǝ baxlap, ularning ⱪizlirimu pǝyda bolƣanda, 2 Hudaning oƣulliri adǝmlǝrning ⱪizlirining qirayliⱪ ikǝnlikini kɵrüp, ulardin haliƣiniqǝ ɵzlirigǝ hotunlar aldi. ^◼   3 Xunga Pǝrwǝrdigar: «Insanlar gunaⱨⱪa mayil ǝt bolƣaqⱪa, Mening nǝpisim ⱨǝmixǝ ularda ⱪalmaydu. Əmdi ularning künliri bir yüz yigirmǝ yilla bolidu» dedi. ^◼  

4 Hudaning oƣulliri adǝmlǝrning ⱪizliri bilǝn billǝ bolup, ulardin balilar tapⱪan künlǝrdǝ wǝ keyinki waⱪitlarda yǝr yüzidǝ Nǝfilimlǝr bar idi. Ular ⱪǝdimki zamanning dangliⱪ palwanliri idi. ^◼   5 Pǝrwǝrdigar yǝr yüzidǝ insan yamanliⱪining kɵpiyip kǝtkǝnlikini, uning kɵnglidǝ saⱪlanƣan oy-hiyallirining kündin-küngǝ yamanlixiwatⱪanliⱪini kɵrdi. 6 Pǝrwǝrdigar yǝr yüzidǝ adǝmni yaratⱪiniƣa puxayman ⱪilip, kɵnglidǝ azablandi. 7 Xuning bilǝn Pǝrwǝrdigar: «Ɵzüm yaratⱪan insanni, qarwa mal, ɵmiligüqi janiwarlar wǝ ⱨawadiki uqar ⱪanatlarnimu yǝr yüzidin yoⱪitimǝn, qünki ularni yaratⱪinimƣa puxayman ⱪildim» dedi. 8 Lekin Nuⱨ Pǝrwǝrdigarning aldida iltipatⱪa erixkǝnidi.

9 Nuⱨning nǝslining bayani mundaⱪ: Nuⱨ ɵz zamanida ⱨǝⱪⱪaniy wǝ ǝyibsiz bir kixi bolup, Hudaƣa yeⱪin yaxap Uning yolida mangdi. 10 Nuⱨtin Xem, Ⱨam wǝ Yafǝt degǝn üq oƣul tɵrǝldi. 11 Lekin dunya Hudaning kɵz aldida buzulƣan, yǝr yüzi zulumƣa tolup kǝtkǝnidi. 12 Huda yǝr yüzigǝ nǝzǝr selip ⱪarisa, mana, dunya buzulup kǝtkǝnidi, qünki ⱨǝr tirik jan yǝr yüzidǝ ɵz yolini buzup taxliƣanidi.

13 Huda Nuⱨⱪa mundaⱪ dedi: «Mana, ⱨǝmmǝ tirik janliⱪni tügitixni ⱪarar ⱪildim, qünki dunya ularning zulumiƣa tolup kǝtti. Mana, Mǝn ularni yǝr bilǝn ⱪoxup ⱨalak ⱪilimǝn. 14 Əmdi sǝn ɵzünggǝ gofǝr yaƣiqidin bir kemǝ yasiƣin. Kemining iqidǝ ⱨujrilar bolsun. Iqi-sirtiƣa ⱪarimay sürkigin. ^◼   15 Sǝn uni xundaⱪ yasiƣinki, uzunluⱪi üq yüz gǝz, kǝngliki ǝllik gǝz wǝ egizliki ottuz gǝz bolsun. ^◼   16 Kemigǝ ⱨǝm bir pǝnjirǝ yasap, uni ɵgzidin bir gǝz egiz ⱪilƣin wǝ kemining yan tǝripigǝ ixik ⱪoyƣin. Tɵwǝn, ikkinqi wǝ üqinqi bolup, kemini üq ⱪǝwǝt ⱪilip yasiƣin. 17 Qünki mana, Mǝn asmanning astidiki ⱨayatliⱪ nǝpisi bar ⱨǝmmini ⱨalak ⱪilidiƣan topanni yǝr yüzigǝ ǝwǝtimǝn. Buning bilǝn yǝr yüzidiki ⱨǝmmining nǝpisi tohtaydu. 18 Əmma ǝⱨdǝmni sǝn bilǝn tüzimǝn. Sǝn oƣulliring, ayaling wǝ oƣulliringning ayallirini elip, kemigǝ kirgin. 19 Ɵzüng bilǝn billǝ ⱨayat ⱪelixi üqün jan-janiwarlarning ⱨǝmmisidin elip, ⱨǝr türidin bir jüp ǝrkǝk-qixini kemigǝ kirgüzgin. 20 Uqar ⱪanatlarning türliri bolsun, qarwa malning türliri bolsun yaki yǝrdiki ⱨǝmmǝ ɵmiligüqi janiwarlarning türliri bolsun, ⱨayat ⱪelix üqün ⱨǝrbir türidin bir jüp aldingƣa kǝlsun. 21 Ɵzüng wǝ ular üqün yǝydiƣan ⱨǝr hil ozuⱪtin elip, yeningƣa yiƣip ⱪoyƣin». 22 Nuⱨ xundaⱪ ⱪildi, u Huda uningƣa buyruƣanning ⱨǝmmisini orunlidi.