1 Xundaⱪ ⱪilip, asman bilǝn yǝr, barqǝ mǝwjudatliri bilǝn ⱪoxulup yaritilip boldi. ^◼   2 Yǝttinqi küni Huda ⱪilƣan ixini tamamlap bolƣanidi. U ⱪilƣan barqǝ ixidin yǝttinqi küni aram aldi. 3 Huda ⱪilƣan barqǝ yaritix ixliridin yǝttinqi küni aram alƣini üqün, Huda yǝttinqi künini mubarǝklǝp, uni muⱪǝddǝs kün ⱪilip bekitti.

4 Bu asman bilǝn yǝrning tarihidur. Pǝrwǝrdigar Huda asman bilǝn yǝrni yaratⱪan kündǝ, ^◼   5 zeminda tehi dǝl-dǝrǝh yoⱪ idi, yǝrdǝ zira’ǝtlǝrmu tehi ünmigǝnidi, qünki Pǝrwǝrdigar Huda yǝr yüzigǝ tehi yamƣur-yeƣin yaƣdurmiƣanidi wǝ yǝr teriydiƣan adǝmmu yoⱪ idi. 6 Əmma yǝrdin ⱨor qiⱪip, pütün yǝr yüzini suƣardi.

7 Andin Pǝrwǝrdigar Huda Adǝm’atini yǝrning topisidin yasap, ⱨayat nǝpisini uning burniƣa püwlidi. Buning bilǝn Adǝm’ata tirik jan boldi. ^◼  

8 Pǝrwǝrdigar Huda xǝrⱪ tǝrǝptǝ Edǝn degǝn jayda bir baƣ bǝrpa ⱪilip, Ɵzi yaratⱪan adǝmni u yǝrgǝ ⱪoydi. ^◼   9 Pǝrwǝrdigar Huda yǝrdǝ kɵrünüxi qirayliⱪ, yeyixkǝ yahxi bolƣan ⱨǝr hil dǝrǝhlǝrni ündürdi. Baƣning otturisida bolsa U ⱨayatliⱪ dǝrihi wǝ yahxi-yamanni bildüridiƣan dǝrǝhni ündürüp qiⱪardi.

10 Baƣni suƣirix üqün Edǝndin bir dǝrya eⱪip qiⱪti, u tɵt bax eⱪinƣa bɵlündi. 11 Birinqisining nami Pixon bolup, altun qiⱪidiƣan pütün Hawila degǝn yǝrni aylinip aⱪidu. 12 U yǝrning altuni naⱨayiti yahxi, u yǝrdǝ mǝrwayit wǝ ⱨeⱪiⱪmu tepilidu. 13 Ikkinqi dǝryaning nami Gihon dǝryasi bolup, pütün Kux zeminini aylinip aⱪidu. 14 Üqinqi dǝryaning nami Dijlǝ dǝryasi bolup, Assurning xǝrⱪ tǝripigǝ aⱪidu. Tɵtinqi dǝryaning nami Firat dǝryasidur.

15 Pǝrwǝrdigar Huda Adǝm’atini elip, u baƣda ixlǝp, uni pǝrwix ⱪilsun dǝp, uni Edǝn beƣiƣa yǝrlǝxtürdi. 16 Pǝrwǝrdigar Huda Adǝm’atiƣa ǝmr ⱪilip: «Baƣdiki ⱨǝmmǝ dǝrǝhlǝrdin haliƣiningni yegin. 17 Əmma yahxi-yamanni bildüridiƣan dǝrǝhning mewisidin yemigin, qünki uningdin yegǝn kününgdǝ qoⱪum ɵlisǝn» dedi.

18 Andin keyin Pǝrwǝrdigar Huda: «Adǝmning yalƣuz boluxi yahxi ǝmǝs. Mǝn uningƣa layiⱪ bir yardǝmqi ⱨǝmraⱨ yaritip berǝy» dedi.

19 Pǝrwǝrdigar Huda yǝrdiki ⱨaywanlar wǝ ⱨawadiki ⱨǝmmǝ uqar ⱪanatlarni tupraⱪtin yasiƣandin keyin, Adǝm’atining ularƣa ⱪandaⱪ at ⱪoyidiƣanliⱪini kɵrüx üqün, ularni uning aldiƣa kǝltürdi. Adǝm’ata ⱨǝr janiwarƣa ⱪandaⱪ at ⱪoyƣan bolsa, uning eti xu bolup ⱪaldi. 20 Bu tǝriⱪidǝ Adǝm’ata ⱨǝmmǝ qarwa mal, ⱨawadiki uqar ⱪanatlar wǝ daladiki ⱨǝmmǝ janiwarlarƣa at ⱪoydi. Əmma Adǝm’ata üqün uning ɵzigǝ ohxaydiƣan ⱨeqbir yardǝmqi ⱨǝmraⱨ tepilmidi.

21 Xunga Pǝrwǝrdigar Huda Adǝm’atiƣa bir eƣir uyⱪu saldi. U uhlawatⱪanda, Huda uning ⱪowurƣiliridin birini qiⱪiriwelip, ornini ǝt bilǝn etip ⱪoydi. ^◼   22 Andin Pǝrwǝrdigar Huda Adǝm’atidin alƣan ⱪowurƣidin bir ayalni yasap, uni Adǝm’atining aldiƣa kǝltürdi. 23 Adǝm’ata: «Bu ǝmdi sɵngǝklirimdin elinƣan sɵngǝk, etimdin elinƣan ǝt bolƣaq, «ayal» dǝp atalsun, qünki ǝrdin elinƣandur» dedi. ^◼   24 Xunga bir adǝm ɵz ata-anisidin ayrilip, ɵz ayali bilǝn bir bolup, ikkisi bir tǝn bolidu. 25 Adǝm’ata bilǝn ayali ikkilisi yalingaq bolsimu, uyalmaytti.