1 Yilan yǝr yüzidǝ Pǝrwǝrdigar Huda yaratⱪan janiwarlarning ⱨǝmmisidin ⱨiyligǝr bolup, ayaldin: «Rasttinla, Huda: ‹Baƣdiki dǝrǝhlǝrning ⱨeqⱪaysisining mewisidin yemǝnglar› dedimu?» dǝp soridi. 2 Ayal yilanƣa jawab berip: «Baƣdiki dǝrǝhlǝrning mewisidin yesǝk bolidu. 3 Əmma baƣning otturisidiki dǝrǝhning mewisi toƣrisida Huda: ‹Buningdin yemǝnglar, ⱪolmu tǝgküzmǝnglar, bolmisa ɵlisilǝr› degǝn» dedi. 4 Yilan ayalƣa: «Ⱨǝrgiz ɵlmǝysilǝr. 5 Bǝlki buningdin yesǝnglar, xu küni kɵzliringlarning eqilip, yahxi-yamanliⱪni bilixtǝ Hudadǝk bolup ⱪelixinglarni Huda bilidu» dedi.

6 Ayal dǝrǝhning mewisining yeyixkǝ yahxi, kɵzgǝ qirayliⱪ wǝ ǝⱪil berix jǝⱨǝttin jǝlpkar ikǝnlikini kɵrdi. U mewidin elip yedi wǝ uningdin yenida turƣan erigimu bǝrdi. Umu yedi. 7 Xuning bilǝn ikkilisining kɵzliri eqilip, ɵzlirining yalingaq ikǝnlikini bilip ⱪaldi. Ular ǝnjür yopurmaⱪlirini bir-birigǝ ulap, ɵzlirigǝ yepinqaⱪ-pǝrtuⱪ yasaxti. 8 Kün salⱪin bolƣanda ular Pǝrwǝrdigar Hudaning baƣda mangƣan xǝpisini anglap ⱪaldi. Xuning bilǝn Adǝm’ata ayali bilǝn Pǝrwǝrdigar Hudaning ⱨuzuridin ⱪeqip, baƣdiki dǝrǝhlǝrning arisiƣa yoxurunuwaldi.

9 Əmma Pǝrwǝrdigar Huda Adǝm’atini qaⱪirip, uningƣa: «Sǝn ⱪǝyǝrdǝ?» dǝp soridi. 10 U jawab berip: «Mǝn baƣda xǝpǝngni anglap, yalingaq bolƣinim üqün ⱪorⱪup ketip, yoxurunuwaldim» dedi. 11 Huda uningdin: «Yalingaq ikǝnlikingni sanga kim bildürdi? Mǝn sanga yemigin dǝp ǝmr ⱪilƣan dǝrǝhning mewisidin yedingmu?» dǝp soridi. 12 Adǝm’ata jawab berip: «Sǝn manga ⱨǝmraⱨ boluxⱪa bǝrgǝn ayal dǝrǝhning mewisidin manga bǝrgǝnidi, xuning üqün yedim» dedi. 13 Pǝrwǝrdigar Huda ayalƣa: «Bu nemǝ ⱪilƣining ?» dedi. Ayal jawab berip: «Yilan meni azdurdi, xuning üqün yedim» dedi.

14 Pǝrwǝrdigar Huda yilanƣa:

«Sǝn bu ⱪilmixing üqün ⱨǝmmǝ qarwa mal

wǝ dalaning barliⱪ janiwarliri arisida lǝnǝtkǝ ⱪalisǝn.

Ⱪorsiⱪing bilǝn beƣirlap yürüp,

ɵmürwayǝt topa yǝysǝn.

15 Mǝn sǝn bilǝn ayalning arisiƣa,

sening nǝsling bilǝn ayalning nǝslining arisiƣa düxmǝnlik salimǝn.

U sening bexingni yanjiydu.

Sǝn bolsang, uning tapinini qaⱪisǝn» dedi.

16 Andin U ayalƣa:

«Ⱨamilidarliⱪingning azablirini ⱨǝssilǝp axurimǝn.

Baliliringni aqqiⱪ tolƣaⱪ yǝp tuƣisǝn.

Sǝn eringgǝ ixtiyaⱪ baƣlaysǝn.

U bolsa seni baxⱪuridu» dedi.

17 Andin keyin U Adǝm’atiƣa:

«Sǝn ayalingning sɵzigǝ ⱪulaⱪ selip,

Mǝn sanga uningdin yemigin dǝp,

ǝmr ⱪilƣan dǝrǝhtin yegǝnliking üqün,

yǝrmu sening sǝwǝbingdin lǝnǝtkǝ uqraydu.

Sǝn ɵmürwayǝt muxǝⱪⱪǝt qekip, uningdin ozuⱪlinisǝn.

18 U sanga tikǝn wǝ yantaⱪ ündüridu,

sǝn bolsang etizdiki zira’ǝtlǝrni yǝysǝn.

19 Tupraⱪⱪa ⱪaytⱪuqǝ sǝn pexanǝngning tǝri bilǝn nan yǝysǝn,

qünki sǝn yǝrdin elinƣan,

ǝsli topidin bolƣaqⱪa, yǝnǝ topiƣa ⱪaytisǝn» dedi.

20 Adǝm’ata uning ayali barqǝ tiriklǝrning anisi bolidiƣini üqün uningƣa Ⱨawa dǝp at ⱪoydi. ^◼  

21 Pǝrwǝrdigar Huda Adǝm’ata bilǝn uning ayaliƣa teridin kiyim ⱪilip, ularni kiydürüp ⱪoydi. 22 Pǝrwǝrdigar Huda: «Mana, adǝm yahxi-yamanni bilixtǝ Bizdin biridǝk bolup ⱪaldi. Əmdi ⱪolini uzitip, ⱨayatliⱪ dǝrihidin yǝwelip, mǝnggü ⱨayat ⱪalmisun» dedi. ^◼   23 Xuning bilǝn Pǝrwǝrdigar Huda uni Edǝn beƣidin qiⱪiriwetip, uni ɵzi ǝsli elinƣan tupraⱪⱪa ixlǝydiƣan ⱪilip ⱪoydi. 24 U Adǝm’atini ⱪoƣlap qiⱪarƣandin keyin, ⱨayatliⱪ dǝrihigǝ baridiƣan yolni tosux üqün, Edǝn beƣining xǝrⱪ tǝripigǝ kerublar wǝ ⱨǝr tǝrǝpkǝ pirⱪiraydiƣan yalⱪunluⱪ bir ⱪiliqni ⱪoyup ⱪoydi. ^◼