1 Pǝrwǝrdigar Musaƣa sɵz ⱪilip mundaⱪ dedi:

2 «Sǝn Bǝni Isra’ilƣa mundaⱪ degin: ‹Əgǝr bir kixi Pǝrwǝrdigarƣa atax toƣrisida ⱪilƣan wǝdisini ada ⱪilmaⱪqi bolsa, atiƣan kixi toƣrisida u sǝn tohtatⱪan jenining baⱨasi boyiqǝ ix ⱪilixi kerǝk.

3 Yexi yigirmǝ yaxtin atmix yaxⱪiqǝ bolƣan ǝr kixining baⱨasini, sǝn muⱪǝddǝs jayning xekǝlining ɵlqimi boyiqǝ ǝllik xekǝl kümüxkǝ tohtatⱪin. 4 Ayal kixining baⱨasini ottuz xekǝlgǝ tohtatⱪin.

5 Əgǝr yexi bǝx yaxtin yigirmǝ yaxⱪiqǝ bolsa, sǝn ǝrkǝk kixining baⱨasini yigirmǝ xekǝlgǝ, ayal kixining baⱨasini on xekǝlgǝ tohtatⱪin.

6 Əgǝr yexi bir aydin bǝx yaxⱪiqǝ bolsa, sǝn oƣul balining baⱨasini bǝx xekǝl kümüxkǝ, ⱪiz balining baⱨasini üq xekǝl kümüxkǝ tohtatⱪin.

7 Əgǝr yexi atmix yaki uningdin qongraⱪ bolsa, sǝn ǝr kixining baⱨasini on bǝx xekǝlgǝ, ayal kixining baⱨasini on xekǝlgǝ tohtatⱪin.

8 Əgǝr bir kixi sǝn tohtatⱪan baⱨani berixkǝ ajiz kǝlsǝ, u kaⱨinning aldida turƣuzulsun wǝ kaⱨin uning baⱨasini bekitsun. Kaⱨin wǝdǝ ⱪilƣan kixining ǝⱨwaliƣa ⱪarap, uning baⱨasini bekitip bǝrsun.

9 Əgǝr u kixining Pǝrwǝrdigar üqün kǝltüridiƣini ⱨaywan bolsa, bundaⱪ Pǝrwǝrdigarƣa atalƣan ⱨaywanlar, muⱪǝddǝs ⱨesablinidu. 10 U ⱨǝrgiz ⱨaywanni baxⱪa birigǝ almaxturmisun, naqar bolsa uni yahxi birigǝ yaki yahxi bolsa uni naqar birigǝ almaxturmisun. Mubada bir ⱨaywanni yǝnǝ bir ⱨaywan bilǝn almaxturmaⱪqi bolsa, awwalⱪisi wǝ orniƣa almaxturulƣan ⱨǝr ikkilisi muⱪǝddǝs ⱨesablansun.

11 Əgǝr ⱨaywan Pǝrwǝrdigarning aldida sunuxⱪa bolmaydiƣan bir napak ⱨaywan bolsa, bu ⱨaywan kaⱨinning aldiƣa elip kelinsun. 12 Andin kaⱨin uning yahxi-yamanliⱪiƣa ⱪarap baⱨasini tohtatsun. Kaⱨin uning baⱨasini ⱪanqigǝ tohtatⱪan bolsa, xunqǝ bolsun.

13 Əgǝr igisi pul tɵlǝp, ⱨaywanni ⱪayturuwelixni halisa, u sǝn tohtatⱪan baⱨaƣa yǝnǝ uning bǝxtin birini ⱪoxup bǝrsun.

14 Əgǝr bir kixi, ɵyüm Pǝrwǝrdigarƣa atilip muⱪǝddǝs bolsun dǝp, ɵyini Uningƣa atiƣan bolsa, kaⱨin ɵyning yahxi-yamanliⱪiƣa ⱪarap, baⱨasini tohtatsun. Kaⱨin baⱨasini ⱪanqigǝ tohtatⱪan bolsa, xunqǝ bolsun. 15 Əgǝr ɵyini Pǝrwǝrdigarƣa atiƣan kixi uni ⱪayturuwelixni halisa, u sǝn tohtatⱪan baⱨaƣa uning bǝxtin birini ⱪoxup bǝrsun, andin ɵyi yǝnǝ ɵzining bolidu.

16 Əgǝr bir kixi ɵz mirasi bolƣan etizliⱪining bir ⱪismini Pǝrwǝrdigarƣa atisa, sǝn uningƣa terilidiƣan uruⱪ miⱪdariƣa ⱪarap baⱨasini bekitkin. Xundaⱪki, bir homǝr arpa uruⱪi ketidiƣan yǝr bolsa, uning baⱨasi ǝllik xekǝl kümüxkǝ tohtitilsun. ^◼   17 Əgǝr bir kixi xadliⱪ yilidin tartip ɵz etizliⱪini Pǝrwǝrdigarƣa atiƣan bolsa, sǝn uning baⱨasini ⱪanqigǝ tohtatⱪan bolsang, xunqǝ bolsun. 18 Əgǝr bir kixi xadliⱪ yilidin keyin ɵz etizliⱪini Pǝrwǝrdigarƣa atiƣan bolsa, kaⱨin kelidiƣan xadliⱪ yiliƣiqǝ ⱪanqilik ⱪalƣanliⱪini ⱨesab ⱪilip, baⱨasini tohtatsun. Ɵtüp kǝtkǝn yillarƣa ⱪarap bekitilgǝn tuluⱪ baⱨasidin muwapiⱪ miⱪdarda elinsun. 19 Əgǝr bir kixi ɵz etizliⱪini Pǝrwǝrdigarƣa atiƣandin keyin, pul tɵlǝp uni ⱪayturuwalay desǝ, sǝn tohtatⱪan baⱨasiƣa yǝnǝ uning bǝxtin birini ⱪoxup bǝrsun. Andin etizliⱪ yǝnǝ ɵzining bolidu.

20 Əgǝr u etizliⱪni pul tɵlǝp ⱪayturuwalmay, baxⱪa kixigǝ setip bǝrsǝ, keyin u etizliⱪni ⱪayturuwelixⱪa bolmaydu, 21 bǝlki xadliⱪ yilida etizliⱪni ⱪayturux pǝyti kǝlgǝndǝ, bu etizliⱪ huddi toluⱪ beƣixlanƣan yǝrgǝ ohxax Pǝrwǝrdigarƣa atap muⱪǝddǝs dǝp sanilip, kaⱨinlarƣa tegip, ularning miras yeri bolup ⱪalidu.

22 Əgǝr bir kixi setiwalƣan, lekin ɵz mirasi bolmiƣan bir etizliⱪni Pǝrwǝrdigarƣa atiƣan bolsa, 23 kaⱨin xadliⱪ yiliƣiqǝ ⱪalƣan yillarni ⱨesablap, etizliⱪning baⱨasini tohtatsun. U küni bu kixi Pǝrwǝrdigarƣa atap muⱪǝddǝs ⱪilƣan nǝrsining sǝn tohtatⱪan baⱨasi boyiqǝ pul tɵlǝp bǝrsun. 24 Lekin xadliⱪ yili kǝlgǝndǝ etizliⱪ kimdin elinƣan bolsa, yǝni yǝrning igisi bolƣan kixigǝ ⱪayturup berilsun. 25 Sǝn tohtitidiƣan baⱨalar ⱨǝmixǝ muⱪǝddǝs jayning xekǝlining ɵlqimi boyiqǝ ⱨesablinip, bir xekǝl yigirmǝ geraⱨⱪa barawǝr bolsun.

26 Lekin qarwa malning tunji balisi bolsa tunjiliⱪi sǝwǝbidin Pǝrwǝrdigarƣa mǝnsup bolƣaqⱪa, mǝyli kala bolsun, mǝyli ɵqkǝ yaki ⱪoy bolsun, uni ⱨeqkim Pǝrwǝrdigarƣa atimisun, qünki u ǝslidǝ Pǝrwǝrdigarningdur. 27 Lekin bu napak bir ⱨaywanning tunji balisi bolsa, igisi sǝn tohtatⱪan baⱨasiƣa yǝnǝ uning bǝxtin birini ⱪoxup berip, ⱪayturuwalsun. Lekin bǝdǝl tɵlǝp uni ⱪayturuwelixni halimisa, bu ⱨaywan sǝn tohtatⱪan baⱨaƣa setilsun.

28 Əgǝr bir kixi Pǝrwǝrdigarƣa ɵz melidin bir nǝrsini toluⱪ beƣixliƣan bolsa, mǝyli u adǝm bolsun, mǝyli ⱨaywan bolsun yaki miras yeri bolsun, undaⱪ nǝrsǝ ⱨǝrgiz setilmisun yaki pulƣa ⱪayturulup elinmisun. Pǝrwǝrdigarƣa toluⱪ beƣixlanƣan ⱨǝr nǝrsǝ ǝng muⱪǝddǝs bolup, Pǝrwǝrdigarƣa mǝnsup bolidu. 29 Əgǝr bir adǝm ɵlümgǝ mǝⱨkum ⱪilinƣan bolsa, uning üqün ⱨǝrgiz bǝdǝl tɵlinip ⱪayturuwelinmisun, bǝlki qoⱪum ɵltürülsun.

30 Mǝyli yǝrning axliⱪi bolsun yaki dǝrǝhlǝrning mewisi bolsun, yǝrdin qiⱪⱪan ⱨǝmmǝ ⱨosulning ondin biri Pǝrwǝrdigarƣa mǝnsup bolup, Pǝrwǝrdigarƣa atap muⱪǝddǝs ⱪilinsun. 31 Əgǝr bir kixi uning tapⱪan mǝⱨsulatlirining ondin bir ⱪismi üqün pul tɵlǝp, uni ⱪayturuwelixni halisa, uningƣa yǝnǝ uning baⱨasining bǝxtin birini ⱪoxup berip ⱪayturuwalsun. 32 Padidiki ⱨǝmmǝ kala wǝ uxxaⱪ malning tǝⱪdim ⱪilinidiƣan ondin bir ⱪismi bolsa: padiqining tayiⱪining tegidin ɵtkǝn ⱨǝr oninqi ⱨaywan Pǝrwǝrdigarƣa atap muⱪǝddǝs ⱪilinsun. 33 Ⱨeqkim uning yahxi-yamanliⱪiƣa ⱪarap baⱪmisun wǝ uni tegixiwalmisun. Əgǝr uni tegixkǝn bolsa, awwalⱪisi bilǝn orni tegixtürülgǝn ⱨǝr ikkilisi muⱪǝddǝs ⱨesablansun. U ⱨǝrgiz ⱪayturuwelinmisun›».

34 Mana bular Pǝrwǝrdigar Sinay teƣida Musa arⱪiliⱪ Bǝni Isra’ilƣa bǝrgǝn ǝmrlǝrdur.